20 патрон үшін 400 мың теңге сұрағаны қалай кетті
Шымкент гарнизоны әскери сотында Оңтүстік аймағындағы әскери бөлімдердің бірінде қару-жарақ қоймасының бастығы лауазымын атқарған 30 жастағы Бақыт ЕРКЕБҰЛАНҒА қатысты қылмыстық іс қаралды.
Б.Еркебұлан Қылмыстық кодекстің 287-бабы 3-бөлігі мен 291-бабы 3-бөлігі 1-тармағына сәйкес қару-жарақтарды заңсыз сатып алу, беру, сату, сақтау, тасымалдау және қызметтік жағдайын пайдаланып оқ-дәрі ұрлау қылмысымен айыпталды.
Еркебұлан былтыр 22 қарашада түрлі калибрлі 20 патронды 400 000 теңгеге сатпақ болған жерінен ұсталған болатын.
Тергеу анықтағандай, карулы күштерде келісімшартпен қызмет еткен Еркебұлан жарты жыл бұрын қару-жарақ қоймасының аға сақшысы қызметіне тағайындалып, барлық материалдық жауапкершілікті мойнына алған. Қызмет барысында ол арсеналдан 7,62 мм ЛПС калибрлі 5 патронды (жеңіл оқ), 7,62 мм Т-46 калибрлі 5 патронды (трассирлік оқ) және 5,45 мм ПС калибрлі 10 патронды ұрлап, онысын ешкімге айтпай, патрондарды әскери бөлімнен алып шығып, сатып алушы іздей бастаған. Ақыры "Калашников" патрондарын алғысы келетін адамды тапты. Бірақ әлгі кісі ҰҚК қызметкері болып шықты.
Айыпталушының айтуынша, ол қару-жарақ пен оқ-дәрілерді түгендеу кезінде қоймада осы 20 патронның артық екенін анықтаған. Оны оқу-жаттығу кезінде үнемделген оқтар деп ойлаған қоймашы есеп-қисапты бұзбау үшін қойма жанындағы контейнерге тығып, атылған гильзалар ретінде көрсетіп қойыпты. Одан соң патрондарды өзі ұрлап әкеткен.
Сотта ол кінәсін мойындады. Әскери сот екі бапты да дәлелденген деп танып, айыпталушыны шартты түрде 5 жылға бас бостандығынан айыруға үкім шығарды. Енді экс-әскери қызметкер "сержант" әскери атағынан айырылып, процессуалдық шығындарды төлейді және зардап шеккендерге өтемақы қорына 77 мың теңге төлеуге міндеттелді.
Бірақ оның апелляциялық шағым түсіру құқығы әлі бар.
Фото: depositphotos.com.
Аударған А.Олжаев.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
