Бастапқыда қала билігі тек косметикалық жөндеу жұмыстарын жүргізуді жоспарлаған, бірақ кейін ғимаратты толығымен жаңарту жөн деп шешті
Алматы қалалық құрылыс басқармасы мемлекеттік сатып алу порталында "Наталия Сац атындағы мемлекеттік академиялық орыс балалар және жасөспірімдер театры" ғимаратына реконструкция жүргізу және оған қосымша құрылыс салу жұмыстарына лот жариялады. Өтінімдерді қабылдау 2025 жылғы 8 қаңтарда аяқталады. Лоттың жалпы сомасы – 21,7 млрд теңге. Бірінші жылға бөлінетін қаржы – 20,9 млрд теңге, ал қалған 883 млн теңге екінші жылға қарастырылған. Реконструкцияның уақыты – 16 ай, мердігер олқылықтарды жоюға міндетті болатын ал кепілдік мерзімі – 7 жыл.
Сац атындағы жасөспірімдер театрын реконструкциялау жобасы техникалық жағынан күрделі нысандар санатына жататындықтан, мердігерге бірнеше талаптар қойылады:
- I санатты құрылыс-монтаждау жұмыстарын жүргізуге рұқсаты болуы,
- қаржылық тұрақтылыққа ие болуы,
- салықтық қарыздары болмауы.
Алайда құрылыс саласындағы мемлекеттік сатып алулар бойынша тәжірибесі болу талабы қойылмайды.
Лотқа "Engineering center ltd" компаниясы дайындаған жұмыс жобасына мемлекеттік сараптаманың оң қорытындысы қоса берілген. Сараптама қорытындысында ғимаратты реконструкциялауға қажетті барлық рұқсаттар мен техникалық шарттардың коммуналдық ұйымдардан алынғаны көрсетілген. Сондай-ақ ғимарат сипаттамасы келтірілген: театрдың қазіргі аумағы – 14,6 мың шаршы метр, ал қосымша құрылыс аумағы – 10,5 мың шаршы метр болады деп жоспарланған.
Сац атындағы театрды реконструкциялау көптен бері айтылып келеді. Себебі 80 жылдық ғимарат қатты тозған. Бірақ өзі жергілікті маңызы бар сәулет ескерткіші. Бастапқыда билік тек косметикалық жөндеу жұмыстарын жүргізуді көздеген, бірақ кейін ғимаратты толығымен жаңарту қажет деген шешім қабылдады. Өйткені былтыр наурыз айында болған жер сілкінісі кезінде ғимараттың жертөле бөлмелері зақымданған, қабырғаларда жарықтар пайда болған және сахнаның механизмдері бұзылған.
Фото: Тикетон.
Аударған А.Олжаев.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
