Салық кодексіне сәйкес, блогерлер жарнамадан түсетін табысына салық төлейді
Елімізде ресми түрде 745 блогер тіркелген. Олар осы жылдың 9 айында мемлекетке 1,2 млрд теңгеден астам салық төледі. Бұл туралы Мемлекеттік кірістер комитетінен мәлім етті, дейді ҚазАқпарат.
“Қазақстан Республикасының “Онлайн-платформалар және онлайн-жарнама туралы” Заңының ережелеріне сәйкес инфлюенсер (блогер) – онлайн-платформада басқа да тұлғаларға ақпаратты кәсіпкерлік қызмет мақсатында жариялайтын онлайн-платформаны пайдаланушы. Бүгінгі таңда Республика бойынша 745 блогер (тізім әлеуметтік желілерде – Instagram, Youtube, TikTok-та 20 мыңнан астам жазылушысы бар жеке тұлғалардан құрылған) бар. Салық кодексіне сәйкес, блогерлердің, оның ішінде жарнама беруден немесе ақпараттық өнімдерді жылжытудан түсетін табыстарға салық салынады”, - деп атап өтеді комитеттен агенттіктің ресми сауалына орай.
Ведомство мәліметінше, егер блогер жалдамалы жұмыскерлердің еңбегін пайдаланса немесе оның жылдық табысының мөлшері 12 ең төменгі жалақыдан асса (2024 жылғы 1 қаңтардан бастап ең төменгі жалақы - 85 000 теңге, бұл 1 020 000 теңгені құрайды) жеке кәсіпкер ретінде тіркелуге міндетті.
“Жалпы, отандық блогерлердің көпшілігі қазірдің өзінде кәсіпкер саналады және қолданылатын салық режиміне байланысты тиісті салықтарды төлейді. Мәселен, соңғы 9 айда олар 1 млрд 226 млн теңгеден астам сомаға салық төледі”, - деді комитеттен.
Айта кетейік, блогерлер БАҚ ретінде тіркеле алады. Бірақ олар ресми тіркелген жағдайда Масс-медиа туралы заң талаптарын орындауы керек.
Фото: freepik.com.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
