Акция барысында 10 күннің ішінде өңір тұрғындары полиция бөлімшелеріне жалпы құны 4 миллион теңгеден астам сомаға 72 қару тапсырды
Ақмола облысында тұрғындардан тіркелмеген атыс қаруын, оқ-дәрілер мен жарылғыш заттарды сатып алу бойынша республикалық акция өтуде, деп хабарлайды ҚазАқпарат тілшісі.
Облыстық ПД баспасөз қызметінің мәліметінше, ақмолалықтар полицияға ерікті түрде қару-жарақ заттарын тапсырғаны үшін қарудың түріне қарай әр данасы үшін 10-нан 100 айлық есептік көрсеткішке дейінгі сомада төлем алады.
"Акцияның мақсаты - қоғамдық қауіпсіздікті қамтамасыз ету, атыс қаруы мен жарылғыш заттарды қолдану арқылы жасалған қылмыстардың алдын алу. Сондай-ақ, бұл азаматтарға бірнеше санат бойынша бағаланатын ерікті түрде тапсырылған қару бірлігі үшін қосымша ақшалай сыйақы алуға мүмкіндік береді", - дейді ведомстводан.
ПД баспасөз қызметінен атап өткендей, акция барысында 10 күннің ішінде өңір тұрғындары полиция бөлімшелеріне жалпы құны 4 миллион теңгеден астам сомаға 72 қару тапсырды, оның ішінде 60 тегіс ұңғылы, 10 – ойық, 2-травматикалық.
"Қазіргі кезде тапсырылған қарулар департаменттің жедел – криминалистикалық басқармасында баллистикалық сараптамадан өткізілуде. Зерттеу нәтижелері бойынша азаматтарға ақшалай қаражат төленеді", - деп толықтырды ведомстводан.
Фото: inform.kz.
