Оңтүстік Корея мемлекеті тағы бір қаһарманының мүрдесін алып кетті
Бүгін таңертең Қызылорданың әуежайынан корей елінің ұлт азаттығы үшін күрескен қаһарман ұлы, генерал ХОН Бом Доның сүйегі арнайы ұшақпен Кореяға тасымалданды. Айта кетейік, бұл миссия осыған дейін Қазақстан президенті Қасым-Жомарт ТОҚАЕВ пен Оңтүстік Корея елінің президенті КИМ Чже Ин арасындағы келісімге сәйкес орындалды.
Кореяның азаттығы үшін басын бәйгеге тіккен Хон Бом Доның тағдыры әу бастан-ақ оңай болмады. Бүлдіршін кезінен жетім қалып, жоқшылықты да, түрмені де, жойқын соғысты да көрді. Жапондармен ұрыста партизандар жасағына жетекшілік етіп, ұлт батырына айналды. Тіпті ЛЕНИНМЕН де жүздесіп, өз елінің тәуелсіздігі турасында пікір алмасқанын мұрағаттағы құжаттар айғақтайды.
Алайда өз дәуірінде Хон Бом До баһадүр болып ұлықталмады, саяси репрессия өз дегенін істеді, Қиыр Шығыстан 1937 жылы Қазақстанға, оның ішінде Қызылордаға жер аударылды.
Қызылордада Хон Бом До корей театрында күзетші болып жұмыс істеп, жан бақты. Қарапайымдылығы соншалық, оның батыр, генерал болғанын көпке дейін жан баласы білмеді, ол айтпады. Кейін келе сол өнер ордасы ұлт қаһарманы туралы арнайы спектакльді көрерменге көзайым етті. Хон Бом Доның тікелей ұрпағы болмады. Ауыр тағдыр иесі 1943 жылы 25 қазанда көз жұмды.
Уақыт оза Сыр жерінде Хон Бом До мемориалы бой көтерді. Корей батырының есімімен көше аталды. Енді міне, Хон Бом Доның сүйегі қайта қазылып, екі ел келісімімен бүгін өз Отанына оралды.
Еске сала кетейік, осыған дейін Корея мемлекеті азаттық үшін күрескен батырлары ХВАН Ун Ден мен Ге Бон Удың мүрдесін Қазақстаннан алып кеткен болатын.
