Димаштың әніне танымал туристік жерлерде клип түсірілді
ҚР Туризм және спорт министрлігі мен "Kazakh Tourism" Ұлттық компаниясы" акционерлік қоғамы 63 106 000 теңгеге келісімшарт жасасты. "Димаш ҚҰДАЙБЕРГЕННІҢ қатысуымен Қазақстан туризмін насихаттау" дейтін қызмет үшін осындай соманы төлеуге дайын.
Бір қызық тұсы – келісімшартта тапсырыс берушінің кім екені, тапсырыстың техникалық құжаттамасының мазмұны жария болмасын, қолдан келгенше құпия қалсын деген тармақ бар.
Министрлік бюджеттен ештеңе шығындамай жаңа клип түсіріліп жатқанын хабарлап үлгерген. Бұл жерден өтіріктің иісі шығатыны білініп тұрды. Әсіресе ҚР Туризм және спорт вице-министрі Ержан ЕРКІНБАЕВТЫҢ мына сөзінен кейін:
"Бұл жоба Қазақстанның бірегей сұлулығына назар аудартып қана қоймай, көрермендерге өнер туындысы арқылы елімізді жаңа қырынан көрсетуге жол ашады. Бейнебаян арқылы көрермендер Қазақстанды мәдени мұрасы бай, қайталанбас табиғаты бар ерекше мекен ретінде таниды деп үміттенеміз".
Бұған дейін ҚР Туризм және спорт министрлігінің қолдауымен "Kazakh Tourism" АҚ Димаш Құдайбергенмен бірге елдің туристік нысандарында клип түсіруге кіріскені хабарланған. Жоба аясында Қазақстанның табиғи және мәдени мұрасына арналған жаңа музыкалық композиция таныстырылады. Түсіру Шарын шатқалы, Көлсай көлдері, Ақмешіт үңгірі, Әзірет-Сұлтан музей-қорығы, Бозжыра шатқалы, Торыщ аңғары және басқа да жерлерде өтті.
Келісімшарттың техникалық сипаттамасында жобаның мақсаты – Қазақстан Республикасын және оның туристік әлеуетін ТМД, Еуропа және Азия нарығына таныту деп көрсетілген. Күтілетін нәтиже – YouTube, Facebook, Instagram, Twitter, VK, Weibo және TikTok интернет-ресурстарында 15 миллион қаралымға жету. Шенеуніктердің жоспарынша, бұл 2029 жылға дейін келетін туристер санын 4 миллион адамға дейін арттыруға әкеледі.
Бұл келісім аясында жарық көрген туынды Димаш Құдайбергенге тиесілі. Алайда ол авторлық құқықты беру туралы келісім бойынша Туризм және спорт министрлігіне және "Kazakh Tourism" Ұлттық компаниясы" АҚ-ға қалған құқықтардың бәрін береді.
Төлем актілеріне қарағанда, келісімшарт бойынша қазірге дейін 16 800 000 теңге ғана төленген.
Фото: ҚР Туризм және спорт министрлігінің ресми сайты.
Аударған А.Олжаев.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
