Ресей аумағына кіруге шектеу енгізілгеніне қарамастан, кейбір әуе компаниялары Қазақстаннан шығатын рейстерге билет сатып жатыр
РФ үкіметі енгізген шектеулер ресми түрде алынып тасталғанға дейін Қазақстан мен Ресей арасында ұшақ қатынамайды, деп хабарлайды Sputnik Қазақстан.
Бұл туралы Қазақстан елшілігі РФ Федералды қауіпсіздік қызметінің шекара қызметіне сілтеме жасап хабарлады.
"Жоғарыда аталған шектеулер ресми түрде алынып тасталғанға дейін екі ел арасында жолаушылар ұшағы ұшпайды. Билет сатып алу әуе рейстерінің қайта қалпына келгенін білдірмейді және жолаушыға таңдалған бағыт пен рейс күні бойынша ұшатынына кепілдік бермейді", - делінген Қазақстанның Ресейдегі елшілігінің сайтында.
РФ үкіметінің өкіміне сәйкес, қазіргі уақытта Ресейге елде тұруға ыхтиярхаты бар және емделуге жіберілген (035-1/у үлгісіндегі Қазақстанның анықтама қағазы және Ресейдің медициналық мекемесінен емдеу күні көрсетілген шақыру қағазы бар болған жағдайда) қазақстандықтар кіре алады.
Ресейге кіруге рұқсат берілген шетелдік азаматтардың санаттарымен мына сілтеме арқылы толығырақ танысуға болады.
Фото: Global Look Press.
