Мәншүк Аймұрзиева бұған дейін өткен сот отырысында өзінің кінәсін мойындап
Атырауда сот үкімімен облыстық денсаулық сақтау басқармасының бұрынғы басшысы Мәншүк АЙМҰРЗИЕВАҒА 5 миллион теңгеден астам айыппұл салынды, деп хабарлайды ҚазАқпарат.
"Бүгін №2 Атырау қалалық сотында облыстық денсаулық сақтау басқармасының бұрынғы басшысы Мәншүк Аймұрзиеваға қатысты қылмыстық істі қарау аяқталды. Ол ҚР Қылмыстық кодексіндегі 371-баптың 2-бөлігі (ауыр салдарға әкеліп соққан салғырттық) бойынша айыпталған еді.
Сот оны осы баппен кінәлі деп таныды. Оған 2000 АЕК көлемінде, яғни 5 миллион 302 мың теңге айыппұл салды. Сонымен бірге, ол үш жыл медицина саласында басшылық қызметті атқару құқығынан айырылды", - деп хабарлады облыстық соттың баспасөз қызметінен.
Мәншүк Аймұрзиева бұған дейін өткен сот отырысында өзінің кінәсін мойындап, процессуалды келісім жасауға ниет танытқан болатын. Ол 2017-2019 жылдары Атырау облыстық денсаулық сақтау басқармасын басқарды. Ал, былтырғы казанда Атырау облыстық перзентханасындағы тоңазытқышта сәби өлімі тіркелгеннен кейін өз еркімен қызметінен кеткен еді.
