Солтүстік Қазақстан облысының әкімдігі аймақ тұрғындарының қауіпсіздігі қамтамасыз етілетініне сендірді
14 сәуір күні бортында Қазақстан азаматтары бар Лондоннан ұшып келетін ұшақ Петропавл халықаралық әуежайына қонады, деп хабарлайды ҚазАқпарат.
Солтүстік Қазақстан облысының әкімдігі аймақ тұрғындарының қауіпсіздігі қамтамасыз етілетініне сендірді. Санитарлық-эпидемиологиялық қауіпсіздік пен COVID-19 таралуын болдырмаудың барлық шарасы жасалады.
Әзірге отандастарымыз елге "Air Astana" әуекомпаниясының Airbus A321 Neo ұшағымен жеткізілетіні ғана белгілі. Лондоннан келетін адам саны туралы хабарланған жоқ.
"Бекітілген алгоритмге сәйкес, жергілікті атқарушы органдар азаматтарды қабылдау бойынша барлық іс-әрекет үйлестірілген, барлық қажетті күштер мен құралдар бар. ҚР Бас мемлекеттік санитарлық дәрігерінің қаулысына сәйкес азаматтар COVID-19-ға зертханалық тексеру жүргізу үшін 2 тәулікке оқшауланады. Әрі қарай нәтижелер шыққан соң үй карантиніне жіберу үшін өз өңірлеріне ұйымдасқан түрде жіберіледі. Рейсті қабылдау және отырғызу Республикалық штабпен келісілген. Барлық қосымша шаралар туралы хабарланатын болады", - делінген облыс әкімдігінің хабарламасында.
Осыған байланысты қосымша ақпаратты облыс әкімінің орынбасары Руслан Әлішев 13 сәуірде өтетін брифингіде хабарлайды.
