Оны Жамбыл ауданы Жалпақтөбе ауылының тұрғындары ерікті түрде жинаған
Жамбыл облысының Қордай ауданына алғашқы гуманитарлық көмек жеткізілді, деп хабарлайды ҚазАқпарат "Хабар 24" телеарнасына сілтеме жасап.
Телеарнаның хабарлауынша, қазір ауданда жағдай қалыпты. Құқыққорғау органдары, Ұлттық ұлан сарбаздары, төтенше жағдай саласының қызметкерлері тыныштықты күзетуде. Сондай-ақ өткен түні Сортөбе ауылына алғашқы гуманитарлық көмек келіп жеткен. Оны Жамбыл ауданы Жалпақтөбе ауылының тұрғындары ерікті түрде жинаған. 5 тонна ұн, 1,5 тонна май, 2 тонна қант, 2 тонна күріш, балаларға жаялықтар, жылы киімдер, 10 мың дана дәрі-дәрмек штабқа түсірілді.
"Енді, қажет болған жағдайда көмекке мұқтаж жандарға тарату шаралары ұйымдастырылады. Бүгін кешке дейін тұрғындар тарапынан қосымша тағы 10 тоннаға жуық азық-түлік, тұрмысқа қажетті заттар жеткізіледі деп күтілуде.
Сондай-ақ бүгін мектеп, балабақшалар жұмыс істей бастайды. Кеше білім ошақтары мен мектепке дейінгі білім мекемелері балаларды қабылдауға әзірленді. Қазір аудандық білім бөлімінің мамандары мектептерді аралап, жағдайды көріп, бағамдап қайтпақ", - деп хабарлады телеарна.
