Судья пара берді деген күдікпен ұсталған ақтөбелік прокурор Есентұр Қадыровты екі айға қамау туралы үкім шығарды
13 қараша күні 14-00-де Есентұр ҚАДЫРОВ (суретте) өзі тұратын үйінің ауласында досы, Ақтөбе облысы прокурорының ішкі қауіпсіздікті қамтамасыз ету бойынша аға көмекшісіне 40 мың доллар берген. Бұл қаражатты Е.Қадыров үстінен қозғалған қылмыстық істі алып тастау үшін беріпті. Ақша Бас прокуратураның ішкі тергеу департаментіне жетуге тиіс еді. 40 мың доллар қылмыстық істі жабу үшін ғана емес, қызметтік жолда «қамқоршы» болатындарға да берілген сыйақы. Алайда 13 миллион теңге тиісті жеріне жеріне жетпей қалған.
Е. Қадыровтың досы Бас прокуратураға хабарлап, Астанадан арнайы топ жедел ұшып келген. Қадыровқа қатысты бір жарым ай жасырын тергеу жұмыстары жүргізілген. Ақша беріп жатқан жерінде ұсталды.
15 қараша күні кешке №2 Ақтөбе сотынан қамау туралы санкция сұралды. Қадыровты қамауды сұрған прокурордың айтуынша, күдіктінің облыстық прокуратурада жоғарғы қызметте болған әріптесі тергеу ісіне кедергі келтіруі мүмкін. Қадыров және оның адвокаты судья Алима ӘДІЛОВАДАН тергеу абақтысына қамамай, үйқамақта ұстауын сұрады.
- Мен қоғамға қауіп төндірмеймін. Тергеудің объективті жүргізілгенін қалаймын. Менің тарапымнан тергеушілердің ісіне кедергі жасалмайды, - деді Қадыров.
Қадыров өзін ұстауға тырысып баққанымен, сотта көз жасына ерік беріп қойды.
Күдіктінің адвокаты Айсұлу ШАЛАБАЕВА Қадыровтың екі баланың үлгілі әкесі, өзін жақсы жағынан көрсеткендігін ескеруді сұрады. Судья шешім шығармас бұрын пара бергеніңді мойындайсың ба деп сұрады. Күдікті түсінік беруден бас тартқанын айтты. Екі жақты тыңдап болған Алима Әділова ақылдасу бөлмесіне кетті. 22.00 де сот залына оралған ол айыптаушы тараптың ұсынысын қабылдап, Қадыровты тергеу абақтысына 2 айға қамау туралы үкім шығарды.
