Инженер-геодезист жарты жыл бойы далаға шығып, геодеректер жинадым деген. Шын мәнінде ешқайда шықпай, түк істемей, тек жалақы алып отырған
Шымкентте "Шымкентгеодезия" филиалының басшысы, ҚР Цифрлық даму, инновациялар және аэроғарыш өнеркәсібі министрлігі Геодезия және картография комитетінің "Геодезия және кеңістіктік ақпараттың ұлттық орталығы" кәсіпорнының қызметкері Ерлан БУҚАНОВ (1987 жылы туған) сотталды.
Оған ҚР ҚК 371-бабының 1-бөлігі (салғырттық) бойынша айып тағылды. Сонымен бірге "Шымкентгеодезия" филиалының инженері Жанболат САРДАРБЕКОВ (1983 жылы туған) алаяқтық жасағаны үшін жауапқа тартылды.
Іс былай болған. Филиал биылғы ақпаннан тамыз айына дейін мемлекеттік инвестициялық жоба аясында бірқатар топографиялық-геодезиялық және картографиялық жұмыстар жүргізуі тиіс болған. Осы мақсатта геодезистер тобы Шымкент пен қала маңында дала жұмыстарын атқаруы керек болған. Топтың бригадирі инженер Сардарбеков болған. Бірақ инженер бригаданың онсыз да жақсы жұмыс істеп жатқанын біліп, дала жұмыстарына бөлінген іссапарлық қаражатты иемденуге бел байлаған. Осылайша бұл бригадир ешқайда бармай, тек жалақы табеліне қол қойып, ақшасын алып отырған.
Ал филиал директоры Ерлан Буқанов өзіне тапсырылған учаскелерде дала жұмыстарының атқарылуын еш қадағаламай, жалақыны толық көлемде төлеу туралы бұйрықтар шығарып отырған. Инженер мен директордың осындай салғырттығы нәтижесінде мемлекетке 2 126 592 теңге көлемінде зиян келген.
Тергеу мен сот барысында Сардарбеков кінәсін толық мойындап, өкінгендей болып, келтірілген залалды толық көлемде өтеді. Зардап шеккен тарап – "Ұлттық геодезия және кеңістіктік ақпарат орталығы" РМК-ның бас кеңсесі оны кешіріп, оған қатысты ешқандай талап қоймады. Осыны ескере отырып, сот Сардарбековке қатысты алаяқтық фактісі бойынша қылмыстық істі тоқтатып, оны қылмыстық жауапкершіліктен босатты.
Ал Буқанов салғырттығы үшін кінәлі деп танылып, оған 6 айға бас бостандығын шектеу, пробациялық бақылау және 100 сағаттық қоғамдық жұмыс жазасы тағайындалды. Дегенмен ол "Шымкентгеодезия" филиалының директоры қызметінен босатылмайды. Буқанов зардап шеккендерге өтемақы қорына 36 920 теңге төлеуі тиіс.
Фото: © Ratel.kz / Айдын Олжаев.
Аударған А.Олжаев.
ТАҚЫРЫПҚА ОЙ ҚОСЫП, ПІКІРІҢІЗБЕН БӨЛІСУ ҮШІН TELEGRAM КАНАЛЫМЫЗ БАР!
