Бейжіңде өзара ынтымақтастық мәселелерін тез арада шешу үшін Солтүстік Қазақстан облысының кеңсесі ашылады, деп хабарлайды ҚазТАГ тілшісі.
Облыс әкімінің ресми сайтында жарияланған хабарда айтылғандай, облыс әкiмi Құмар Ақсақалов жұмыс бабымен Қытай Халық Республикасының Хубэй провинциясында болды. Аталмыш сапар биылғы жылдың тамыз айында өткен аймақтық кеңестiң келiсiмдерi аясында ұйымдастырылды. 61 млн халқы бар Хубэй провинциясы экономикада бесiншi орынға ие, бұл өңiр бiрлескен жобаларды жүзеге асыруда стратегиялық серiктес бола алады.
Ухань қаласында өңiр басшысы жергiлiктi компаниялардың басшыларымен келiссөздер өткiздi. Азық-түлiк өнiмдерiн импортқа шығаратын iрi сауда желiлерiмен де кездесу ұйымдастырылды. Облыс экономикасына инвестиция құюға құлық танытқан Бейжiң қаласы мен Шаньдун, Хэнань, Цзянсу, Шэнси провинцияларынан келген кәсiпорындардың өкiлдерi де кездесуге қатысты. Келiссөздер барысында СҚО-ның инвестициялық мүмкiндiктерi айтылды. Өңiр басшысы қытайлық бизнесмендердi бiрлескен жобаларды жүзеге асыру үшiн Солтүстiк Қазақстан өңiрiне шақырды. Жуық арада Бейжiңде өзара ынтымақтастық мәселелерiн шұғыл шешуге арналған СҚО-ның офисi ашылады.
«Бiздiң өңiр бiрнеше бағыт бойынша экономикалық ынтымақтастықты ұсына алады. Әсiресе, ауыл шаруашылығы, өнеркәсiп, инновация, сауда салаларында жұмыс жасауға болады. Инвестициялық жобаларға мемлекеттiң есебiнен өндiрiстiк инфрақұрылым тартылады. Әр жобаны жеке-жеке қарастырамыз», — дедi Құмар Ақсақалов.
Қытай Халық Республикасына жұмыс сапары аясында облыс әкiмi Құмар Ақсақалов Хубэй провинциясының губернаторы Ван Сяодунмен де кездестi.
«СҚО-мен ынтымақтастықты одан әрi дамытуда үлкен қадам жасап отырмыз. Ауыл шаруашылығы, өнеркәсiп, инфрақұрылым құрылысы, машина жасау, қайта өңдеу және туризм бағытында iскерлiк ынтымақтастығымызды одан әрi тереңдете түсемiз. Кәсiпорындар мен бизнес өкiлдерiне байланысты нығайту үшiн барын жасаймыз», — дедi Ван Сяодун.
«Жақсы дамыған өндiрiстiк база, ғылым мен бiлiмi iлгерi кеткен Хубэй провинциясы мен ресурстары бай әрi дамыған ауыл шаруашығы бар СҚО бiр-бiрiн толықтырып тұр. Бұл ынтымақтастықтың үлкен мүмкiндiктерiн көрсетедi. Бұл сапар әр түрлi салаларда бiрлескен жобаларды жүзеге асыруға үлкен септiгiн тигiзедi», — дедi Құмар Ақсақалов.
Кездесу соңында СҚО әкiмдiгi мен Хубэй провинциясының халық үкiметi арасында ынтымақтастық жөнiндегi меморандумға қол қойылды.
Шиян қаласында облыс әкiмi қала басшысы Занг Вейгуомен кездестi. Жиында екi жақты ынтымақтастық мәселелерi талқыланды. Облыс әкiмi «Dongfeng Motor Corporation» iрi зауытын да аралады. Бұл кәсiпорын автомобиль жасаумен айналысады.
