Қала тұрғындары бүгіннен бастап қоғамдық көлікте 80 теңге төлейтін болады
Тасымалдаушылар бастапқыда жол ақысын 70 теңгеден 90 теңгеге бір-ақ көтеруді ұсынған екен. Алайда, мәслихат депутаттары тұрғындардың пікірін ескере келіп, 10 теңгелік өсімді қабылдап, дауыс беріпті. Жол ақысының қымбаттауына тасымалдаушы компаниялар шығынының артып, кірісінің кемуі себеп болған.
Бұл туралы Павлодар қаласы әкімдігінің баспасөз хатшысы Салтанат ӘКІМБЕКОВА хабарлады:
- Тасымалдаушы компаниялар ұсынған есептердің бәрі мұқият зерттелді. Биыл қосалқы бөлшектер мен коммуналдық қызмет құны өскен.Сондай-ақ, биыл жанар-жағармай бағасы да қымбаттады. Осы жайттар ескеріліп, жол ақысын 10 теңгеге көтеру шешімі шығарылды,- дейді ол.
Ал мектеп жасына дейінгі балалар қоғамдық көліктерде бұрынғыдай тегін қатынай алады. 7 жастан 15 жасқа дейінгі жеткіншектер мен зейнеткерлерге арналған жеңілдіктер де сақталады. Десе де, жол ақысының 10 теңгеге қымбаттауына риза болып жатқан адам жоқ.
«Тамақ та, дәрі де, киім де қымбат. Енді, міне жол ақысын да көтеріпті. Шыдаймыз, көріміз, көнеміз. Бұрын автобуста 35 теңге төлесем, енді 40 теңге берем. Біреуге бес теңге ақша емес, шығар. Бірақ, жалғыз зейнетақыға қарап отырған біз үшін әр тиын маңызды», - дейді зейнеткер Ілияс ІСЛЯМҰЛЫ.
«Стипендия аламыз, өзіміздің тамағымыз бен жолақымыздан аспайды. Одан басқа оқу-құралдарын алуға жетпей қалалды мысалға. Өзіміз жеткізе алмай жатқанда оның үстіне жол ақысы көтеріліп жатыр. Қызылорданың тумасымын. Бөтен қалада өмір сүру оңай емес қой. Әсіресе, бәрі шарықтап жатқанда», - дейді студент Марғұлан НАҒАШЫБАЙ.
Облыс орталығында күніне қоғамдық көлік қызметіне 260 мыңға жуық адам жүгініп, 159 автобус пен 77 трамвай жолаушы тасымалдайды екен. Ал жол ақысының құны соңғы рет шаһарда былтыр тамызда көтерілгенін айта кетейік. Десе де, шенеуніктердің жағымды жаңалығы да жоқ емес. 1-ші қаңтардан бастап керекулік оқушылар мен студенттер қоғамдық көліктерде тегін қатынайды деп күтілуде.
