Қоғамдық тыңдауға қатысқан көпшілік Ленин көшесінің ендігі атауы Астана болып өзгереді деп күткен жоқ
Кеше Павлодардағы «Колос» мәдени-сауықтыру орталығында Ленин көшесінің атауын ауыстыру жөнінде қоғамдық тыңдау өтті. Жиынға белгілі қоғам қайраткерлері мен қалалық мәслихаттың өкілдері, жергілікті тұрғындар қатысты.
Қоғамдық тыңдауға қатысқан көпшілік Ленин көшесінің ендігі атауы Астана болып өзгереді деп күткен жоқ. Өйткені жыл басында қала тұрғындары Павлодардың орталық көшесінің бірі, әрі үлкен даңғыл саналатын Кутузов көшесін Астана деген атаумен ауыстыруға ұсыныс жасаған болатын. Жергілікті билік өкілдері Астана атауы Ленин көшесіне берілетінін мәлімдегенде, жиынға қатысушы қауым бұл жаңалыққа наразылығын жасыра алмады.
Осы мәселеге байланысты өз пікірімен бөліскен журналист Федор КОВАЛЕВ: «Кутузов көшесі үлкен, әрі жүргіншісі көп даңғыл деп айтуға болады. Ал Ленин көшесінің жарты бөлігінде жер үйлер орналасқан, ескілеу көше. Бұл көшені Астана көшесі деп айтуға келмейді», – деді.
Қоғам белсендісі, мәдениет қайраткері Ғалия БАЛТАБАЙ көше атауын өзгерту мәселесіне түсіністікпен қарауға шақырып: «Өз жерімізде, өз отанымызда тұрып, неге біз өз мәселемізді шеше алмаймыз? Басқа жерлерде де ондай болып жатыр ғой,оған түсіністікпен қарау керек», – дейді.
Қалалық әкімдік берген ақпаратқа сәйкес, көше атауын ауыстыруға қатысты шығын демеушілер тарапынан өтеледі, қазынадан бір тиын алынбайды екен. Ал мәслихат өкілдері көше атауына байланысты өз шешімдерін келесі аптада жария етеді.
Фото: pavlodarnews.kz
