Мәжіліс мақұлдаған заңға сәйкес жер шетелдіктерге үйленген азаматтарымызға берілмейді
Мәжілісте 29 қараша күні жер дауынан кейін әзірленген кейбір заңнамалық актілерге жер қатынастарын реттеу мәселелері бойынша өзгерістер мен толықтырулар енгізу туралы заң жобасы бірінші оқылымда қабылданды. Енді жаңа заң жобасы бойынша шетелдіктерге, өзге ел азаматтарымен некеде тұрған қазақстандықтарға, азаматтығы жоқ адамдарға жер беруге тыйым салынады. Әрине, парламенттің жоғарғы палатасыда мақұлдап Елбасы қол қойса.
«Заң жобасында шекаралық белдеу мен шекара аумағында орналасқан жер учаскелерін шетелдіктерге, азаматтығы жоқ адамдарға, Қазақстан Республикасының шетелдіктермен некеде тұрған азаматтарына немесе шетелдік заңды тұлғаларға және Қазақстан Республикасының құрамында шетелдіктер бар заңды тұлғаларына беруге тыйым салынады», - деп баяндады бүгін мәжілістің жалпы отырысында премьер-министрдің орынбасары, Ауыл шаруашылығы министрі Асқар МЫРЗАХМЕТОВ.
2016 жылы жер митингілерінен кейін Асылжан МАМЫТБЕКОВТЫҢ орнына келген Асқар Мырзахметовтың халықтың талабына сәйкес жерді шетелдіктерге беруді заңмен тыйуы жөн-ақ. Бірақ шетелдікке тұрмысқа шыққандарға қатыстың заңның зардабы қарапайым адамдарға тиіп кетпей ме? Әлде, министр қазақ азаматтары тек қана шетелдік инвесторлармен бас қосады деп ойлады ма екен.
Естеріңізге салай кетейік, 2016 жылы жер кодексіндегі өзгерістерге қатысты Атырау, Ақтөбе, Қызылорда, Семей Алматы қаларында митингілер өткен еді. Артынша жер реформасы бойынша комиссия құрылылған болатын. Сол комиссия жұмысына араласқан ақын Мұхтар ШАХАНОВ аралас некедегі адамдардан келетін қауіпті «Жер туралы» заңға еңгізуіміз керектігін айтқан.
«Жерді Қазақстан азаматтарына жалға беруге болады деп жатырмыз. Тек, бір мәселені қатаң түрде ескеруіміз керек. Бүгінгі таңда 24 мың қазақ қызы қытай жігіттеріне тұрмысқа шығыпты. Қыздарымыздың бұл үрдісі үлкен деңгейде жалғасып жатыр. Болашақта Қазақстан азаматшасына үйленген қытай күйеу балалар сан миллиондаған жерді жалға алып, қытай құдаларды қаптатса қайтеміз? Сондықтан аралас некедегі адамдардан келетін қауіпті Жер туралы заңға енгізуіміз керек», — деген еді М.Шаханов.
Ақын бұнымен тоқтамай шетелдіктерге тұрмысқа шыққан қыздарды азаматтығынан айырып тастау керек деп айтып салды.
«Шетелдікке тұрмысқа шыққан қыздар азаматтықтан шығарылсын. Адамның құқынан гөрі бізге мемлекеттің қауіпсіздігі маңызды. Қазақстанның тұтастығы, бүтіндігі, болашағы маңызды. Қолдауларыңызды сұраймын!», — дегені бар ақынымыздың әлеуметтік желіде.
«Жиен ел болмас» деген Шахановтың шырылы үкімет мүшелерінің құлағына жеткен сияқты. Әйтседе қабылданған заңның орындалуы, олардың барлығына ортақ болуы қадағаланса дейсің.
Үкімет төстік жеп үлгермеген күйеу балалармен майдандасып жатқанда жер сатылып жатыр. Құрылтайшысы Нидерланды мемлекетінде орналасқан «Арселор Миттал Теміртау» компаниясы 2016 жылы жер митингісі болып жатқанда жер телімінің меншік иесіне айналып алған. Бұл туралы жазған болатынбыз. Бқл жөнінде Теміртау қаласының әкімі Ғалым ӘШІМОВКЕ журналисттік сауал да жолдаған едік. Алайда жергілікті билік өкілі мардымды жауап қатпады.
Мәжіліс қабылдаған шетелдікке тұрмысқа шыққан азаматқа жер беруге тыйым салатын заң күшіне енді делік. Алайда ол заң орындала ма? Жоғарыда мысал еткен «митталдар» саны керісінше көбейіп кетсеші. Әгәрәки, кенеттен бақуатты құдалар пайда болып, құдалықтағы алыс-берісте жерімізге көз салса Лакшми МИТТАЛДЫ жарылқағандай жомарттық таныта салмаймыз ба?
Фото: inform.kz
