Қазір кіммен сөйлесе кетсең де саған бірдеңе түсіндіргісі келіп тұрады
Түсіндірушісі көп түсініксіз елде өмір сүріп жатырмыз, ә?!
– Астанадан келдік...
– Жай ма?
– Түсіндіру үшін...
– Алматыдан келдік...
– ?
– Түсіндіру үшін...
– А-а-а...
– Орталықтан ... түсіндіру үшін...
– Ә-ә-ә...
Осыдан кейін түсіндірушілер тобын күту, қошеметтеу басталады. Еттің майлысын, қонақүйдің жайлысын...
Кеудесінде орден-медалі жарқыраған түсініксіздерді әкімдер қойша қайырып, бір керемет залға қамап қояды. Қай түсіндіруші келсе де сол жылмыйған бала, жылтыр бет шал, кимешекті кемпір отырады. Түсіндіруші бірде лепіріп, бірде көпіріп сөйлейді, түсінушілер шыбындаған аттай бас шұлғып, шапалақ ұрумен болады. Айтқандарынан түк түсінбесе де қиқулап, алақан қызартып қайтады. Қызық, ә?!
Жыл сайын бір мәрте түсініксіз сөйлеп, соны түсіндіру үшін мыңдаған түсінікші топ құрып, түйсіксіздерге түсіндіруге қанша қаржы ысырап болады екен... Түсініксіз! Әуелі ақшаны уыстап шашып болсын. Сосын оны да түсіндіретін топтар құрылар...
Ең қызығы сол түсіндіруші топтардың арасында дана бастық, бала бастық, шала бастық, олардың орынбасарлары, белгілі қаламгер, атақты әнші, сүлей күйші, дүлей биші, дарынды журналист, қарымды шаруа, қарынды депутат, әйгілі демократ, т.б. бәрі жүреді.
Олардың алдында омалып отырған отар адам. Сонда апталап, айлап түсіндіргіш бөліп жүрген олардың, жиналып отырған жұрттың негізгі жұмысын кім істеп жатыр, а? Жерді кім қазады, егінді кім орады, малды кім бағады, елді кім басқарады... Әлде, Қазақстанда жиналыс өткізіп, түсіндіруден басқа шаруа жоқ па? Осылай отырған күйі-ақ отыз мықтыдан озып кетеміз! – дегенді түсінбей-ақ қойған жалғыз мен ба?! Мейлі, елді жиып алып төбесін нұқып әлде шұқып тесіп, ақыл "құйып" жатқан түсіндіргіштер жасасын! Бір білгендері бар болар.
Байқағаным «түсіндіргіш мамандығы» жұқпалы екен, қазір кіммен сөйлесе кетсең де саған бірдеңе түсіндіргісі келіп тұрады...
Фото: uvp-pvl.gov.kz.
