Депутат Гүлжан Қарағұсова «шок» болғанынан мен де шок болдым
Бүгіннің қаһарманы Гүлжана ҚАРАҒҰСОВА апайымыз екен. Министр кезінде: Бір сиыр, 5-6 тауығы бар адамға атаулы әлеуметтік көмек берілмейді, – деп сиырдың желінін қарап, тауықтың жұмыртқасын санап, елдің есін шығарған Қарақұсованың аяқ-асты оянғанына қайран қалдым?!
2016 жылы ғана «Пекин-Паласта» шалжиып жатқан депутаттарды қызғыштай қорып, «Қалай қамқорлық жасасаң солай жұмыс істейді», –деп шыр-пыр болған экс-еңбек министрі, былтыр наурызда депутаттардың жалақысын 700-800 мың теңге еткенде, күзде 640 млн теңге тағы бөліп, өз айлықтарын «біркелкі» еткенде асқан шешендікпен қорғай білген Мәжілістің қаржы және бюджет комитеті төрайымының халық ішінде 25-30 мың теңге айлық алатындар барын енді біліп «шок» болғанынан мен де шок болдым.
Мені қойшы, медицина саласы қызметкерлері, мұғалімдер тіпті талып түсе жаздады. Айналайын, депутатым-ай, – деп ақсарбас атауда. Жарайды ғой, елдің зарын айтып жатса неге сүйінбеске. Тек, еңбек саласын, бюджетті бақылауға жауапты болған кезде қайда қараған?! «Қалай қамқорлық жасасаң...» дегені енді ғана күшіне еніп жатыр ма? Ол кісіге қамқорлық жасағанымызға көп жыл болды ғой.
Мейлі, депутат ханымды бір Түлен түртіп, көзін ашты-ау. Айналайын, Түлентай, өзгелерін де бір-бір түртіп шықшы? Көп балалы отбасылардың тиыны «қырқылып» кеткенін, мектеп асханаларын буындырып, балалардың тамағын тартып алғандарын тағы біреуі біліп қалып, «шок» болсын.
Екі-үш күн түрткілесең сен де шаршарсың, аса сабырлы да салмақты, нұқымақ түгілі жер қозғалып жатқанда жыбыр етпейтін депутаттар да қайта тынышталар. Тынышталсын. Әйтпесе, осындай шырыл шыққан кезде тарап кететін жаман кеселдері бар. Сосын, улап-шулап қайта келіп алады. Тағы да: «Айлық көтер!» деп дау шығарады. Осылай отыра берсін. Зияны тимесе болғаны.
