Жезөкше қыздар айына 300 мың теңге тапса, емханадағы дәрігер 65 мың теңге табады
Қазақстан өкінішке қарай әлемдік секс-қызметтің ірі орталықтарының біріне айналып барады. Әсіресе Алматыдағы туризмнің осы саласы шетелдіктерді қатты қызықтыратын көрінеді. Астана мен Алматыда, облыс орталықтарында түрлі сауналар, массаждық салондар, боди-массаж дей ме, спа дей ме, тай-массаж дей ме жауырын жазатын орындар жауыннан кейінгі саңырауқұлақтай қаптап кеткен.
Аида ЖЕКСЕНОВА деген блогер енді қызметтің бұл «түрін» заңдастыру қажет деп есептейді. «Әлгіндей массаж орындарында жезөкше қыздар айына 300 мың теңге тапса, емханадағы дәрігер 65 мың теңге табады. Егер заңдастырылса бюджетке «жеңіл жүрістілерден» қомақты қаржы түсер еді, бұл қыздарды секс-құлдыққа тап қылмау үшін де, олардың денсаулығын қорғау үшін де керек. Әрі оларды «крышевать» етіп, қыруар ақша тауып жүргендердің де жолын кесер еді» дейді әлгі блогер.
Өз басым мұндай сорақылықтарға жол беруге болмайды деп есептеймін. Бірақ қоғамда осындай проблема бары рас. Саин мен Сейфуллин көшесін торуылдаған жеңіл жүрісті қыздар интернетке көшіп алған дейді. Қыздардың амалсыз мұндай қадамдарға баруы көбіне материалдық жағдайдан. Еңбегіне сай лайықты жалақы бұйырмауы, тұрмыс тауқыметі, таусылмайтын проблемалар осындай теріс құбылыстарға итермелейді.
Халықтың экономикалық жағдайын көтеру арқылы рухани азғындауға жол бермеу мемлекеттің міндеті. Ал бізде кейбір депутаттардың бұл мәселеге іш тартуына қарағанда мемлекет алдағы уақытта жезөкшелікті заңдастыру арқылы азғындықтан ақша табуға ұмтылатын сияқты. Бұл Қазақстан сияқты мұсылман мемлекеті үшін масқара емес пе?
Дереккөз: Марат Байділдәұлы Facebook парақшасынан алынды. Автордың рұқсатымен жарияланды.
Фото: blog.bnkomi.ru
