Жат жұрттық болып кеткен қазақ жастары арасынан Олимпиада чемпиондарын іздеу керек пе?
Оңтүстік Кореяның Пхенчхан қаласында өтіп жатқан қысқы Олимпиада ойындарында қазақ қызы алтынан алқа тақты. Ол – Динара ӘЛІМБЕКОВА.
Биатлоншы қыз Беларусь құрамасы сапында 4х6 шақырымдық әйелдер эстафетасының жеңімпазы атанды. Қазақтан шыққан тұңғыш чемпион қыз 1996 жылы Қарағанды облысындағы Абай қаласында дүниеге келген.Үш жасында ата-анасымен Қазақстаннан қоныс аударған. Әкесі - қазақ, анасы - беларусь. Өзінен кейін Евгений және Ульяна есімді інісі мен сіңлісі бар.
Беларусь президенті Александр ЛУКАШЕНКО биатлон эстафетасында жеңіске жеткен Динара Әлімбекова, Надежда СКАРДИНО, Дарья ДОМРАЧЕВА, Ирина КРИВКОНЫ «Жеке ерлігі үшін» орденімен марапаттау туралы қаулыға қол қойды.
Динара өзге елге Олимпиада жүлдесін алып берген бірінші қазақ спортшысы емес. 1972 жылы Мюнхен жазғы Олимпиада ойындарында сол кездегі Өзбек Кеңестік Социалистік Республикасының азаматы Әлжан ЖАРМҰХАМЕДОВ (суретте сол жақтағы бірінші) олимп алтына ие болды. Қазақтан шыққан тұңғыш Олимпиада чемпионы 1976 жылы олимпиаданың қоласын да жеңіп алды.
Қысқы Олимпиададан тұңғыш алтын алған қазақ қызы Динара сынды Әлжан Мүсірбекұлының да анасы өзге ұлт өкілі. Оның анасы Прасковья ЖЕРОНИНА украин болған.
2000 жылы Сидней Олимпиадасында ШҚО-ның тумасы Айдын СМАҒҰЛОВ (cуретте он жақтағы бірінші) Қырғыз Республикасының атынан шығып, қола медаль иеленді. Қазақстан ұлттық құрамасына кіре алмай қалған дзюдошы көрші ел атынан бақ сынауды шешкен. Ол қазақтан шыққан тұңғыш дзюдошы Олимпиада жүлдегері атанған. Және Қырғыз Республикасының тарихында тұңғыш Олимпиада жүлдегері боп аты қалды.
2008 жылы Бейжің ойындарында этникалық қазақ Қанат ИСЛАМ аспан асты еліне бокстан қола медаль алып берді. Қанат ҚХР-нің Алтай аймағында 1984 жылы туған. 2010 жылы атажұртқа оралып, 2011 жылы Қазақстан азаматтығын алған. Қазір Қазақстан атынан кәсіпқой рингке шығып жүр.
2016 жылғы төрт жылдықтың басты спорттық додасында Елмұрат ТАСМҰРАТОВ Рио төрінде қола медаль жеңіп алып, Өзбекстанның туын желбіретті. Грек-рим күресінің шебері Елмұрат Зұлыпқарұлы 1991 жылы Өзбекстанның Ташкент облысы, Бостандық ауданы, Қызыл Ту ауылында дүниеге келген. Елмұрат өзбек күрес мектебі арқылы спортқа қадам басқан. 2004 жылы ата-анасы атажұртына жібереді.
Елмұрат Түркістан қаласындағы Бекзат САТТАРХАНОВ атындағы спорттық мектеп-интернатта төрт жыл білім алады. Балуан Қазақстан құрмасы сапында өнер көрсетуге ықласты болған екен. Алайда оны бапкерлер елемеген. Содан кейін туған жері Өзбекстанға қайта оралған.
Фото: youtube.com, e-history.kz, tripadvisor.ru, azattyq.org.
