Павлодарда жалғызбасты ана балаларымен бірге көпқабатты үйдің жертөлесін паналауға мәжбүр
Марина ЮТКИНА осыдан екі жыл бұрын Ресей Федерациясына қоныстану үшін бар жиған-тергенін сатып, бала-шағасымен сонда аттанған. Бірақ, тиісті құжаттарды уақытында жасалмауына байланысты Қазақстанға депортацияланып, елге қайтып оралған. Енді, сот шешімімен олар алдағы 5 жылда көрші елге бара алмайды.
- Ақша тапшылығынан жертөледе тұруға мәжбүрміз. Менің қолымда Қазақстан Республикасының паспортынан басқа құжат жоқ. Елден кеткенде жеке куәлік тапсырылады ғой. Ал Ресей азаматтығын алып үлгерген жоқпыз. Оны растайтын анықтамаға былтыр қыркүйек айында тапсырыс жібердім. Бірақ, ол жақтан әзірге еш жауап келген жоқ. Сондықтан еш құжат жасай алмай, балаларға төленуі тиіс жәрдемақыны да ала алмай отырмын, - дейді Марина Юткина.
Оның үстіне жалғызбасты әйелдің балаларының денсаулықтары сыр берген. Қазір ұлының үлкені аяқастынан ауырып қалып, психдиспансерде ем-дом қабылдауда. 14 жастағы Артур Павлодардағы коррекциялық мектеп-интернатта білім алып жатыр. Ал, 20 жастағы қызы Валерияның туғанынан ақыл-ойының дамуы кешеуілдеген.
Қиын жағдайға тап болған жанұяға жергілікті еріктілер біраз уақытқа жететін киім-кешек пен азық-түлік әкеп берген. Ал аула сыпырып, нәпақасын тауып жүрген Маринаның 25 мың теңге еңбекақысы мүгедек баласының дәрісінен аспайды екен. Керекулік шенеуніктер болса, бұл жанұяға алдағы уақытта қолдан келген көмекті көрсетеміз деп отыр.
- Балаларды ешкім тартып алмайды. Азаматшаға бұдан қорықпау керек. Біз отбасыға кризистік орталыққа баруды ұсындық. Алайда, олар онда мүгедек қыздың денсаулығына байланысты бара алмаймыз дейді. Анасы ондағы өзге азаматтарға бөгет жасаймыз деп ойлайды. Отбасы мүшелерінің құжаттарын жасау үшін Ресей елшілігіне хабарласып, қолдан келген көмекті көрсетуге дайынбыз, - дейді Павлодар қаласы еңбекпен қамту және әлеуметтік бағдарламалар бөлімі жетекшісінің орынбасары Рымкеш САҒЫНОВА.
Отбасына көмек көрсеткен еріктілер болса, олар жанұя паналаған жертөле орналасқан үйдің мекен жайын жарияламауды сұрап отыр. Айтуларынша, жұрт мұнда көптеп ағылып, онсыз да жиі ауыратын мүгедек қыз қорқып қала ма деп алаңдауда. Сондай-ақ, бұзақылар мазаларын алып, пәтер иелерінің кооперативі жалғыз баспанасы – жертөледен қуып шығуы әбден мүмкін дейді. Басқа амалы қалмаған әйелдің өзі енді желі арқылы жерлестерінен көмек сұрап отыр.
