Араб, өзбектер немере бауырларына үйлене беретін болғандықтан шариғи заң бізден басқаша қолданылады
Қазақ әйелінің бетін бүркеп, қара жамылғаны біздің дүниетанымға жат болып саналады. Бірақ ол ашық-шашық жүру деген сөз емес.
Құранда арада неке жүрмейтін ер-азаматқа қыз баланың шаш, мойын сияқты кейбір әуретті жерлерін көрсетіп жүруіне болатыны анық жазылған. Қазақ жеті атаға дейін қыз алыспайтын болғандықтан және өткен ғасырларда әр ру топтасып ауыл болып отырғандықтан ол жерде қыз бала шашын ашып жүруге рұқсат етілген. Бірақ бұл заң келіндерге жүрмейді. Өйткені, күйеуі қайтыс болған жағдайда оны қайнағасына немесе қайнысына қосатын болған. Яғни, арада неке жүреді деген сөз. Ал арабтарда, өзбектерде немерелес ағайындардың балалары үйлене беретін болғандықтан бұл шариғи заң бізден басқаша қолданылады.
Құранда былай дейді: Мүмін әйелдерге де айт: “(Бөгде ерлерден) көздерін сақтасын. Әрі ұятты жерлерін (зинадан) қорғасын. Сондай-ақ зейнеттерін көрсетпесін. Бірақ олардың өзіндігінен көрінгендері басқа (беті, қол-аяқтары). Және бүркеншіктерін омырауларына түсірсін. Зейнеттерін көрсетпесін.
Бірақ ерлеріне, әкелеріне, қайын аталарына, өз ұлдарына, өгей ұлдарына, аға-бауырларына, олардың ұлдарына, әпке-сіңлілерінің ұлдарына, мұсылман әйелдерге, қолдарындағы күңдеріне, әйел керек қылмайтын қызметшілерге немесе әйелдердің ұятты жерлерін білмейтін балаларға көрсетулеріне болады. Және де көмескі зейнеттерін басқаларға білдіру үшін аяқтарын ұрып жүрмесін. Әй мүміндер, түгел Аллаға тәубе қылыңдар! Әрине құтыларсыңдар. (Нұр сүресі, 31 аят). Және Құран Кәрімнің әз-Зарият сүресінің 55 аятында: Ескерт! Өйткені ескерту мүминдерге пайда береді, - дейді.
Құранда қара жамылып, беттеріңді көрсетпеңдер деген сөз жоқ. Әйел адамның қара жамылуы, шашын жайып жылауы қазақта қайғының белгісі. Біздің бұрынғы аналарымыз, әжелеріміз ақ кимешектерін киіп, шылауыштарын оранып, жеңгелеріміз аппақ орамалдарына берік болған елміз. Бірақ кейде мына заманның ағымына қарап сол дәстүрімізден айырылып қаламыз ба деп те алаңдаймын.
Дереккөз: Серікзат ДҮЙСЕНҒАЗЫНЫҢ Facebook-тағы жеке парақшасынан алынды. Автордың рұқсатымен жарияланды.
