Көкек анаға қатысты іздеу жариялаған полицейлер «Өлтіруге әрекеттену» бабы бойынша қылмыстық іс қозғады
Анасы қоқыс жәшігіне тастап кеткен ер баланың жағдайын Павлодар облыстық перинаталды орталығының дәрігерлері бірқалыпты деп бағалауда. Десе де, бөбекті күні-түні бақылауда ұстап отыр. Өйткені, ол 18 градус аяз кезінде далада бір сағаттай жатып қалған.
- Қазір баланың жағдайы жақсы. Арнайы сүт қоспасымен қоректенуде. Жағдайы бірқалыпты, зияны жоқ. Бәрі жақсы болса шығарып қалуымыз мүмкін, - дейді неонатолог-дәрігер Шолпан ҚҰРМАНОВА.
Кеше, 31 қантарда аталмыш ауруханаға нәрестенің жағдайын білу үшін оны құтқарған Нәзира ОМАРОВАНЫҢ барғанын айта кетейік. 53 жастағы әйелдің айтуынша, ол сол күні дәрі сатып алмақ болып далаға шыққан.
Үй маңындағы дәріханалардың бәрі жабылып қалғандықтан, көрші ауданға аттанған. Жолшыбай бір аулада келе жатып баланың шырылын құлағы шалады. Осылайша ол қоқыс жәшігінен сәбиді тапқан. Бірақ, бұған бірден сене алмапты.
- Бала жылап жатты. Кеудеме басып, жылама бәрі жақсы болады, сен қолымдасың деп, қызымның үйіне апардым. Онда жеткен соң полиция мен жедел-жәрдем шақырттық. Бала тыныштанып, қолымда жатты. Жүрегім ауырып кетті. Баланы ауруханаға әкеткенде де, түнімен ұйықтай алмадым, - дейді Павлодар қаласының тұрғыны Нәзира Омарова.
Жалғыз көрпешеге оралған сәби 29 қаңтар күні кешкі уақытта шаһар аулаларының біріндегі қоқыс жәшігінен табылған болатын.
Дәрігерлер салмағы үш жарым келі нәрестенің осыдан екі апта бұрын дүниеге келгенін болжайды. Ал оны қоқыс жәшігіне тастап, ізін суытқан әйелге іздеу жарияланды.
Павлодар облыстық ІІД баспасөз қызметі хабарлағандай, қазір осы оқиғаға қытысты «Өлтіруге әрекеттену» бабы бойынша қылмыстық іс қозғалған.
Баланы алғаш аңғарған Нәзира Омарова енді оның тағдырына алаңдаумен жүр. Әйелдің бүгінде екі баласы мен үш немересі бар екен. Алайда, оның жолдасы тастанды баланы асырап алсақ болады деген ұсыныс білдірген екен.
Сұмдық оқиғаны желі қолданушылары да қызу талқылап жатыр. Сондай-ақ, алдағы уақытта бұл нәрестені асырап алып, өзі тәрбиелегісі келетін отбасылар да табылып жатыр деген үміттеміз.
Фото автордікі.
