Әйтеке би кентіне көгілдір отын 2015 жылы қосыла бастаған, салтанатты шараға облыс әкімі Қырымбек Көшербаевтың өзі қатысқан еді
Қызылорда облысында Қазалы ауданы Әйтеке би кентінің тұрғындары "ГазСтройТранс" ЖШС-не алданыпты. Аталған компания 68 отбасымен «көгілдір отын» қосып береміз деп жаз айларында келісім шартқа отырған екен. Алайда, бес айдың ішінде бар жоғы он үйге ғана құбыр тартылғанымен оның өзі толық аяқталмапты. Қазалықтар монтаждау жұмысына алғаш төлем ретінде 10 мың теңге берсе, кейбіреулері тіптен 100 мыңға дейін берген.
"Газ келсе үйіңізге жаз келеді" деп ұрандатқан компания сөзіне сеніп қалғандардың бірі зейнеткер Әсем БӨЛЕКБАЕВА "ГазСтройТранс" ЖШС-нің кеңсесіне баруды күнделікті әдетіне айналдырған.
«Күнделікті тірлігім осы. «ГазСтройТранстың» кеңсесіне келемін. Қашан келсеңде есік жабық тұрады. Жұмысшылары атауымен жоқ. Көмір аламын деген ақшамды газға бердім. Бірде-бір жұмыс жасалмады. Әкелген бір трубасы жоқ. Қыс түскенде газсыз да, көмірсіз де қалдым»,- дейді Әйтеке би кентінің тұрғыны Әсем Бөлекбаева.
Шарасы таусылған қазалықтар құзырлы органдарға шағым түсірген. Өз міндетін атқармаған компанияға қатысты аудандық сот үкімін шығарыпты.
«ГазСтройТранс" ЖШС тарапынан жасалған шарт бойынша өз міндеттемелерін дер кезінде орындалмай, соның нәтижесінде тұрғындар тарапынан наразылық туындады. Шарт бойынша жасалған міндеттеме бойынша не пеш құрылмаған, өздерінің төлеген түбіртектері бойынша аұшаларын кері қайтару жөнінде талап арыз түсті. Осы 9 талап арыздың қазіргі таңда шешім қабылданды. Яғни тұрғындардың өздерінің ақшаларын кері қайтару жөнінде»,- деді Қазалы аудандық сотының судьясы Қуаныш МЫХАНОВ.
Кент тұрғындары жергілікті әкімдікке де күнде сабылады екен. Олардың жауабы қысқа. Тұрғындар мен жеке компания арасындағы мәселеге араласа алмаймыз дейді екен әкімшіліктегілер.
«68 адамды тақырға отырғызды. Біз не істейміз енді? Біреуінен 50 мың берсе, біреуі 100 мың берді газ құрғызамыз деп. Енді ол адамның өзі де жоқ.Әкімшілікке қаншама рет бардық, ешқандай тұшымды жауап алмадық»,- дейді Әйтеке би кентінің тағы бір тұрғыны Роман ҚЫПШАҚБАЕВ.
Әйтеке би кентінің халқын сарсаңға салған компания біз ғаламтордан іздеп таптық. Қазалыдағы кеңсесі жабық болғанымен ғаламторда жарнамасы жүріп тұр. Бірақ көрсетілген нөмірлерге хабарласқанымызда: ешкім жауап бермейді.
Қырық мың халқы бар Әйтеке би кентіне көгілдір отын 2015 жылдың 21 қазанында қосыла бастаған. Салтанатты шараға облыс әкімі Қырымбек КӨШЕРБАЕВ, «ҚазТрансГазАймақ» АҚ бас директорының бірінші орынбасары Ғалым АЙДОСОВ қатысқан болатын.
