Қатты отын сататын қоймаларды полиция қызметкерлері бақылауға алған
Отыз градустан асқан аяздың беті қайтқанымен Алматы облысының халқы діртектеп отыр. Алматы іргесіндегі Талғар қаласында көмірге екі жүзден астам адам таңнан кезекке тұрды. Бүгін қаладағы қоймаға 70 тонна ғана көмір түскен. Халық бес күн бойы күткен отын аз. Алам деушілер көп.
- Көмірді барлық жақтан іздеп жатырмыз. Көмір жоқ.Әкімдердің қалай жұмыс жасайтындарын осыдан-ақ көруге болады.Не су жоқ. Қатып қалған. Үйіміз даладай аңырап тұр. Балам ол үш күн болды мектепке барған жоқ ,- дейді талғарлық Фарида ҚАЛҚАБАЕВА.
Көмір іздеп сабылысқан ел ішінде полиция қызметкерлері де жүр.
Отын таппай жүйкесі тозған жұрттың бір-біріне жұдырық ала жүгіру фактісі облыста тіркеліпті. Содан болар оңға жуық полиция қызметкері көмір қоймасының маңын бақылауға алған.
- Көмірге қатысты ажиотаж уақытша. Қазір ғана барлық қоймаларды аралап келдік.Көмір біздің ауданда жоқ деп айтуға болмас. Отын алушы халықтың қарасы көп. Және олар үйлеріне үш-төрт реттен түсіріп жатыр, - дейді Талғар ауданы әкімінің орынбасары Шыңғысхан МАМАНОВ.
Алматы облысының әкімі Амандық БАТТАЛОВ көмір тапшылығын алып-сатарлар қолдан жасап отыр деп мәлімдеген болатын. Бұл туралы Қазақпарат агенттігі жазған.
Өңір басшысының бұйрығымен жұмыс тобы құрылып Еңбекшіқазақ ауданы орталығы Есік қаласына облыс әкімінің орынбасары Айдарбек БАЙЖАНОВ бастаған шенділер барған-ды.Олар Есікте 120 тонна қатты отын қоры барын анықтап, Энергетика және ТҮКШ басқармасының басшысы Әсет ҚАНАҒАТОВ енді ауданға күн сайын 200 тонна көмір жеткізілетінін айтқан еді.
Rатеl.kz тілшісі бүгін Есік қаласына арнайы барды.Жергілікті шенеуніктердің айтуынша,олар кешелі бері 800 тоннан астам ғана көмір тауып бере алыпты. Қаладағы негізгі қойманың есігінде құлып. «Көмір жоқ, бүгін болмайды» деген бір жапырақ қағаз ғана тұр. (фото уголь нет)
Кеше Энергетика министрі Қанат БОЗЫМБАЕВ Алматы қаласы мен АЛМАТЫ облысындағы көмір тапшылығы жергілікті шенеуніктердің салғырттығынан туындап отыр деген-ді.
- Тиісті жергілікті органдар қатаң бақылауда ұстау керек бұл мәселені. Мен тиісті әкімдермен өзім өткен аптада, осы аптада өзім сөйлескем. Күнделікті бақылауда бұл мәселені ұстаймыз. Қазір 16 мың тонна Алматыға және Алматы облысына жөнелтілді. Бүгін-ертең тупиктерге келіп, сатылатын болады, - деген еді министр Бірінші Еуразия телеарнасына берген сұхбатында.
Әзірге Алматы облысына Бозымбаевтың көмірі жеткен жоқ. Министр уәде еткен отын келгенше халық алып-сатарлардан көмірдің бір қабын 1000 мың теңгеден ала тұруға мәжбүр.
Фото автордікі.
