Назым Бишімбаевa ұлттық экономика экс-министрінің ісі бойынша сөзжарыста сөз сөйледі
Сөз алдында бұрынғы министрдің жары судьяға былай деді:
"Бұл процеске бірінші кезекте әділдік пен ар-намысқа бей-жай қарай алмайтын Қазақстан Республикасының азаматшасы ретінде қатысып отырмын. Екінші кезекте ғана Қуандық Бишімбаевтың жары ретінде", - деп мәлімдеді Назым БИШІМБАЕВА.
Бұл туралы Tengrinews.kz хабарлайды.
"Күйеуімнің позициясын толықтай қолдаймын, ол кадрлық жұмыстарға жеткілікті түрде назар аударуда Мемлекет басшысының да, Қазақстан халқының да алдында кінәлі емес. Ол адам таңдауда қателесті. Аңғалдығы мен сенгіштігінен осындай күйге түсіп отыр деп ойлаймын. Алайда тағылып отырған айып - пара алу мен қаражат жымқыру қылмысын күйеуім жасаған жоқ. Ол Президент пен Үкіметтің барлық тапсырмасын жауапкершілікпен атқаратын. Ол "Нұрлы жол" бағдарламасын тез арада жүзеге асыруға тырысты және Қазақстандағы шыны зауытының өндірістік бағдарламасын іске асыруға үлес қосқысы келді. Бишімбаев Қуандық өзінің туған жерінде, Қызылордада жұмыс орындарын ашатын шыны зауыты салынғанын қалады", - деді шенеуніктің әйелі.
Назым Бишімбаева сотта күйеуінің қоғамдық қорғаушысы.
Астанада экс-министр мен тағы 22 фигурантқа қатысты істің басты сот отырысы осымен төртінші айға жалғасып жатыр. Осы уақыт бойынша процесс қатысушылары барлық сотталушының, куәгердің, іс материалын зерттеп жатқандардың пікірін тыңдап, аудио және видеожазбалармен танысты. Ал биылғы қаңтарда Қуандық Бишімбаев сотқа берген куәлігінде өзіне тағылған айыппен келіспейтінін және істің қалай болғанын өз тарапынан айтып берген болатын. 25 қаңтарда прокурорлар жаңа айыптау актісін ұсынған. Бұдан кейін экс-министрге тағылған айыптарға тек бір пункт қосылып, ал жалпы өзгеріссіз қалған еді.
