Павлодарда қылмыстық топ екі жыл бойы астыртын арақ жасаумен айналысып келген
Кәсіптерін дөңгелету үшін төрт келіншек пен бір ер адамнан құралған бұл топ Павлодар мен қалаға қарасты Кенжекөл ауылында қоймалар жалдап келген. Ал жалған арақ-шарапты жасауға қажет спирт, шөлмек және акциздік белгілерді Шығыс Қазақстан облысының тұрғыны арқылы жеткізіп отырған.
Жасанды өнім өңір аумағындағы көтерме және бөлшек сауда орындарымен қатар көрші Ресейге де өткізіліп келіпті. Бір ғана тәулікте екі мыңға жуық жалған спирттік өнім әзірлеген қылмыскерлер екі жыл ішінде қымбат темір тұлпарлар мініп, тіпті шетелге бірге демалысқа да барған екен. Қылмыстық топқа көсбасшалық еткен 46 жастағы азаматша сот 7,5 жылға бас бостандығынан айырды.
Сот сондай-ақ, Сейсенбаеваның төрт сыбайластарын 3-6 жылдан қамауға алу жазасына кесті. Бұған қоса, жұртты арзан ішімдікпен алдаған олардың бәрін кәсіпкерлік қызметпен айналысу құқынан айырып, екі жылда жинаған дүние-мүлкін тәркілеп, мемлекет меншігіне өткізуге үкім шығарды. Ал бұған дейін бостандықта болған күдіктілердің бірі үкім алдында сырқаттанып қалып, ауруханаға жатқызылған екен.
- Бесінші фигурант Семей қаласының тумасы. Сырқаттанып ауруханаға түсіп қалғандықтан үкімге келмеді. Бірақ, сол жатқан жерінен қамауға алынатын болады. Бұл азаматша бұған дейін ешқайда шықпау туралы қолхатпен бостандықта жүрген болатын, - деді Павлодар қалалық прокуратурасы бөлімінің аға прокуроры Жамиға АХМЕДЬЯ.
Былтыр мамыр айында қамауға алына бастаған қылмыстық топ мүшелерінің бұған дейін 108 млн теңгеге алынған дүние-мүлкіне тыйым салынғанын айта кетейік. Ал сотталушылардың өзі алдағы екі аптада соттың бұл шешіміне қатысты шағымдануға құқылы.
