Қала мәсліхаты көпшілік болжаған шешімді қабылдады
Бүгін Алматы қаласы қалалық мәслихатының VI шақырылымы мегаполис тұрғындарының көптен бергі ұсынысына және қалалық ономастикалық комиссияның шешіміне сәйкес Алматы қаласының негізгі көшелерінің бірі саналатын Фурманов даңғылын Нұрсұлтан Назарбаев атауына ауыстырды, деп жазады ҚазТАГ агенттігі.
Сессия барысында Бауыржан Байбек алматылықтардан, қоғам қайраткерлері мен үкіметтік емес ұйымдардан, соның ішінде әсіресе жастар тарапынан Фурманов көшесінің атауын Назарбаевқа ауыстыру жөніндегі ұсыныс көптеп түскенін айтып өтті.
Көше атауының өзгеруі тұрғындарға қиындық тудырар белгілі бір мәселелер болмайды. Қажетті анықтама құжаттары әдеттегідей электронды үкіметтен алынады.
Алматының басты көшесінің аты өзгеруін тарихи шешімге балаған «Алматы ақшамы» газетінің бас редакторы, мәслихат депутаты Қали СӘРСЕНБАЙ бұл тарихи шешімді қала тұрғындары көп күткенін айта келіп: «Біз өз жеріміз, еліміз үшін күрескен ата-бабаларымызды, батырларымызды есімізде сақтаймыз. Ал қазіргі заманда Тәуелсіз Қазақстанның іргетасын қалаған, Отанымызды халықаралық деңгейде даңқын асырған адам – әрине, Бірінші Президент Нұрсұлтан Әбішұлы. Біздің мақсат оның ерен еңбегін ұрпаққа мұра ету. Бұл тек менің ғана емес, газетімізге келіп түскен көптеген азаматтардың да пікірі», – деді.
Еске сала кетейік, осыған дейін де қоғам тарапынан Алматының бас көшесі Фурмановтың атын Кенесары сынды батыр тұлғалар мен бұрынғы ел басқарған азаматтардың атымен өзгерту туралы ұсыныс болған-ды. Тіпті, бірер жыл бұрын ғана Фурманов көшесіне саясаткер, қоғам қайраткерлері Заманбек НҰРҚАДІЛОВТІҢ не Алтынбек СӘРСЕНБАЕВТІҢ атын беру туралы қалалық әкімдікке қоғам белсенділері ресми хат та тапсырған еді.
