Павлодар облысында өлілердің тізіміне еніп кеткен тұрғын зейнетақысын ала алмай дал
69 жастағы Бадиғаш ӘБІЛДИНОВА Павлодар облысы, Ақсу ауданы, Сарышығанақ ауылының тұрғыны. Осыдан тура он жыл бұрын зейнеткерлікке шыққан ол жақында өзінің бақилық болғанын естіп білгенде жағасын ұстапты. Мұны елді-мекендегі пошта қызметкерлері жеткізген.
Осылайша айлық зейнетақысын ала алмаған ол жергілікті әкімдік пен халыққа қызмет көрсету орталығына жауап іздеп барған. Бірақ, мұнысынан ештеңе шықпапты.
- Апа, сіз өлген адамдардың қатарындасыз дегенде шошып кеттім. Мен тірімін ғой, деп құжатымды көрсеттім. Өлген азаматтарды тізімге енгізу үшін ауруханадан анықтама тағы басқа құжаттар керек қой. Мен ол тізімге қалай кіріп кеткенімді ұқпадым. Сұрап барған мекемелерден дұрыс жауап берген ешкім жоқ. Сандалып жүрмін қартайған шағымда, - дейді Бадиғаш Әбілдинова.
Жуырда инсульт алып ауруханадан үйге оралған зейнеткер бұл уайымнан соң тағы сырқаттанып қалған екен. Елді-мекенге жеткен балалары болса анасын осы күйге түсірген жергілікті билік өкілдеріне ашулы.
Бүгін, 14 ақпанда облыс орталығына келген қарияның өзі халыққа қызмет көрсету орталығына барды. Зейнеткерді тірілердің тізімінен тапқан ондағы мамандар мекенжай анықтамасын шығарып бергеннен өзге ештеңе істей алмады. Олқылықтың қайдан кеткенін жергілікті зейнетақы қорының қызметкерлері де ұға алмай отыр.
- 9 ақпан күні бұл азаматшаға ақша есептеліп, поштамен арқылы берілуі тиіс еді. Біздегі ақпарат бойынша бұл кісі тірілердің тізімінде тұр. Бұған қоса, тұрғылықты мекенжайы да өзгермеген. Бізден ешқандай қателік болмаған, - дейді Павлодар облысы «Ведомствоаралық әлеуметтік төлемдерді есептеу орталығы» департамент директорының орынбасары Татьяна ЛУКАШОВА.
Ал бастапқыда ат тонын ала қашқан пошта өкілдері кейін хабарласып, жүйенің бұзылғанын жеткізді. Осыған байланысты зейнеткер өлілер тізіміне еніп кеткен көрінеді. Қарияға зейнетақы бүгін төленеді деп сендірген олар бәріне жүйе кінәлі деп ақталуда.
Айта кетерлігі, 69 жастағы Бадиғаш Әбілдинова 43 жыл өмірін ұстаздыққа арнаған. Бес баланы дүниеге әкеліп, тәрбиелеген екен. Бір аптаға жуық сандалған оның бүгін де қан қысымы көтеріліп, ол ауруханаға аттанды.
Фото автордікі.
