Қараусыз қалған аудан тұрғындары Ratel.kz арқылы бастама көтерген еді
Алматыдағы 10-шы ықшам ауданға әкім Бауыржан БАЙБЕКТІҢ атын беру туралы ұсынысқа Тілдерді дамыту басқармасының ономастика бөлімі жауап берді. Бұл туралы ҚазАқпарат агенттігі хабарлады.
Естеріңізге сала кетейік, ықшам ауданды әкім атына ауыстыру туралы «Алматыдағы ықшамауданның біріне Бауыржан Байбек атын беру ұсынылды» атты мақала Ratel.kz сайтына шыққан еді.
Бұл бастаманы осы жылдың 14-ақпанында бұрын әскери қызметте болған зейнеткер көтерген еді. Шағынауданда 25 жылдан бері тұрып келе жатқан Әділ Тұматов көршілес 10 шағынауданы болған соң жедел жәрдем, құтқару қызметі бізді шатастырып, дер кезінде келмейтінін айтқан-ды.
- Мен Нұрсұлтан НАЗАРБАЕВТЫҢ қолын алған адаммын. Біздің ықшамауданға президенттің атында берсе болады. Бірақ Байбектің де қалаға көп еңбегі сіңді. Әкім болғалы көп жұмыс тындырды. Қадірі бар азамат. Тұратын жеріміз әкімнің атын иеленсе жедел жәрдем, құтқару қызметі бізді адаспай табар еді. Әйтпесе, бізге ешкім көңіл бөлмейді, - деген еді қала тұрғыны Әділ ТҰМАТОВ.
Осыған орай ҚазАқпарат тілшісі Алматы әкімдігіне журналисттік сауал жолдаған. Тілдерді дамыту басқармасының ономастика бөлімінің бастығы Қалыбай ӨТЕПБЕРГЕН алматылықтарды шағын ауданды Бауыржан Байбек деп атау туралы ұсыныс алдағы аптада комиссия қарауына ұсынылатынын айтқан.
- Қазір қалада жаңадан қосылған елді мекендердегі құрамдас бөліктеріне түгендеу жұмыстары жүргізілуде. Бірінші кезекте атауы қайталанатын және атауы жоқ әкімшілік-аумақтық бірліктерге, елді мекендердің құрамдас бөліктеріне, яғни көшелерге атау беру жұмыстары қарастырылуда. Аталған жұмыстардан кейін идеологиялық тұрғыда ескірген атауларды ауыстыру жоспарланған. Бұл жұмыстар Қазақстан Республикасының қолданыстағы заңнама талаптарына сәйкес белгіленген тәртіп бойынша жүзеге асырылады. Белгілі бір атаудың қабылдануы үшін 3 комиссия отырысынан, 2 сессиядан өтеді. Сосын Әділет департаментінде тіркеледі, - деді Қалыбай Өтепберген.
Фото: azattyq.org.
