Apple Music әлемдік мобилді қосымшасында әншінің парақшасы мен әндері жойылған
Apple Music туралы әр IPhone телефон иелері хабардар. Айыңа 999 тг. тұратын бұл мобилді қосымша арқылы кез-келген адам ұнатқан әнін жүктеп, тыңдауға мүмкіндік алады. Бұл қосымша желіде толып жатқан басқа бағдарламалардан өзгеше. Себебі, Apple Music әр қолданушының ұнататын ән мәнерін анықтап, жоғары интеллектуалды технологиялар арқылы адамның көңіл-күйіне қарай әндер тізімін баптайды.
Дегенмен, 10 миллион әнші тіркелген базада қазақстандық жұлдыздар саусақпен санарлықтай. Солардың қатарында болған Қайрат НҰРТАС жуырда белгісіз себептермен Apple Music-тан жоғалып кетті. Яғни, бір сәтте «Алматының түндерін» тындап жүрген «айфондары» бар мыңдаған қазақстандықтар ондай мүмкіндіктен айырылып қалды.
Біз Apple Music жүйесін зерттеп, танымал әншілердің әндері базадан қандай себептермен шығып қалу мүмкін екенін анықтап көрдік:
- Жаңа альбом. Әйгілі әншінің су жаңа әндері ұзақ уақыт бойы қолданушыға қолжетімсіз болуы мүмкін. Алайда әншінің бұрынғы әндері сол қалпында базада сақталып тұра береді. Тізімнен «Алматының түндері» жоғалып кеткенін ескерсек, бұл шарттың Қайрат Нұртасқа қатысы жоқ.
- Саундтрек. Егер белгілі әнші өзінің өлеңдерін кинотуындыларға сүйемелдеме ретінде жіберсе, ол да белгілі бір уақыт бойы Apple Music-тен тысқары қалады. Алайда, әншінің «профайлы» еш жаққа жоғалып кетпейді. Яғни, бұл варианттың да Нұртасқа қатысы жоқ.
- Лицензияның аяқталуы. Әнші ресми түрде өзінің әндерін Apple Music жүйесінде жариялауға байланысты шартты созудан бас тартады. Бірақ бұл екіталай, себебі әнші бұл шарт бойынша айтарлықтай қомақты қаржы алып отырады.
- Белгісіз себептермен жүйе редакторлары әншіні тізімнен шығарып жібереді. Бұған себеп ретінде сазгердің ән сапасының төменділігі немесе тыңдаушы санынын тым аздығы болуы мүмкін.
Сонымен, Қайрат Нұртастың халықаралық ән базасынан шығып қалуы неге байланысты? Біз бұл сұраққа жауап іздеп, әншінің ресми өкілімен хабарластық. Жанар ӘЛҒУЖАЕВАНЫҢ сөзінше, бұл жайттан олар хабардар екен. Алайда, оның себептерін айтуға ол үзілді-кесілді бас тартты.
Айта кетейік, ресми түрде жарияланған мәліметке орай, Apple Music қызметі қолданушыларының саны 2018 жылда үш есе артып, 20 миллионға жеткен. Бұл базада әлемдік деңгейдегі танымал әншілермен қатар Төреғали ТӨРЕӘЛІ, Ғалымжан МОЛДАНАЗАР, МузАРТ, Ерке ЕСМАХАН cекілді отандық әншілер де бар.
