Аспан асты елін таңқалдырған қазақтар
Былтыр 2017 жылдың көктемінде қазақ әншісі Димаш ҚҰДАЙБЕРГЕН Қытайда "I Am a Singer" ән байқауында екінші орын алып, аспан асты елінде даңқы шықты. Осы ақпан айының басында ақтөбелік өнерпаз Қытайдағы "Top global Chinese music awards-та" екінші рет "Жылдың ең танымал әншісі" атанған еді. Жалпы, әншінің шығыстағы көрші елде ән кешін беру қалыпты жағдайға айналған. Мәселен былтыр Чанша қаласында 10 мың адамның алдында Қытай, АҚШ, Канада, Украина, Ресей музыканттарының қатысуымен ән салды.
Қытайда танымалдылыққа ие болған тағы бір қазақстандық – Сабина АЛТЫНБЕКОВА. Ол 2014 жылы Тайбейге Азия біріншілігіне барады. Сұлулығымен ханзуларды таңқалдырған бойжеткен турнирдің ең сұлу спортшысы атанып, Instagram желісіндегі тіркелушілер саны үш күннің ішінде 150 мыңнан асып түсті. Сабинаның фотосуреттері Қытайдың ең танымал алдыңғы қатарлы сайттарының сәнін келтірді. Шығыс сұлулығын бағалаушылар оны жапондық фарфорлы қуыршақтар - анимэлерге ұқсатты.
Алайда, көрші Қытай елін бағындырып үлгерген отандастырымыздың қатарында Димаш пен Сабинадан бөлек те адамдар бар. Ханзуларды мойындатқан отандастарымыз бен онда тұрып жатқан қандастарымыз жайлы мәліметтер ұсынамыз.
Арай Айдархан
ҚХР тұратын қазақ әнші, композитор Арай АЙДАРХАН Fujian TV телеарнасындағы «Sounds of nature» ұлттық әндердің музыкалық реалити-шоуында әжесіне арнаған әнін орында, 2013 жылы Арай «Chian Is Listening» сайысында үздік бестіктің қатарына кіріп, қытай эстрадасының танымал өкіліне атанды.
Жанар Сағат
Қазақ қызы кинорежиссер атанып, көзі қарақты көрермендерге 20-ға жуық телехикаяларды ұсынып үлгерген. Ал оның «Таңсәрідегі жабық жарыс» фильмі Қытайда жыл телехикаясы атанған. Сондай-ақ, Жанар Мао Цзе Дунның студенттік өмірі жайлы сыр шертетін «Бір дәуірдің жастары» фильмінің де режисері. Сыншылар бұл фильмге жоғары баға берген соң, Жанар САҒАТҚЫЗЫНА көсемнің балалық шағы туралы телехикая түсіруді сеніп тапсырды.
Данияр Толқынұлы
Қытайдың республикалық «Балалар музыкасы» телевизиялық жобасында 13 жасар этникалық қазақ Данияр ТОЛҚЫНҰЛЫ «Атамекен-ай» әнін орындап, көрермендер көзайымына айналды. «Балалар музыкасы» бүкіл қытайлық жоба болып табылады. Онда іріктеуден өткен өнерпаздар танымал эстрада жұлдыздарың шәкірті атанып, солармен бірге өнер көрсетеді.
Берік Ықылас
ҚХР-ның Синьцзян-Ұйғыр автономды ауданының шағын Қарамай қаласынан келген 35 жасар Берік ЫҚЫЛАС та The Voice China ("Дауыс") танымал вокалды шоуының қазыларын таң қалдырған. Көрмей тыңдау кезеңінде ол көңілді испан композициясы Señorita-ны орындап, қазылармен қатар, көремендердің де ерекше ықыласына бөленген. Төрт музыкалық сарапшылардың үшеуі оған дауыс берген.
Тасқын
2013 жылы этникалық қазақ Тасқын да қытайлық «Дауыс» жобасына қатысқан. Бірінші кезеңде ол «Дудар-ай» әнін орындап, қазылардың көзіне жас үйірілткен.
Қазақ әжелерінің «Аққулар» ансамблі
Қазақ әжелерінің «Аққулар» хор ансамблі қытайдың таланттар шоуын таңқалдырған. Жергілікті телеарна эфирінде Қытай халық республикасының Синьцзян-Ұйғыр автономды ауданының тұрғындары қазақ әні «Жүнді» орындаған.
Фото: Today.kz.
