«Жұлдызды» Instagram жаңалықтары
@aikerim_kaiaubaeva_official Жуырда музыкалық Гәкку арнасынан әнші Әйкерім ҚАЛАУБАЕВА мен Нұрлан ӘЛІМЖАННЫҢ «Екеуміздің әніміз неге бөлек?!» атты туындысын тамашалаймыз. Бұл жаңалықты парақшасына бірінші болып салған Әйкерімді оқырмандары күмәнді сауалдың астына қалдырды. Бұған тыңдарман арасында Нұрланның жарымен ажырасқаны жайлы қауесет себеп болса керек-ті.
Жұрт сөзіне қалам деп қорықты ма, Әйкерім жазбасының астына бірден «Тек өнер, тек достық, әріптестер» деп бадырайтып қойған. Әйтсе де, әнші қызға оқырман алдында қайталай жауап беруіне тура келді. «Сезімді жасыру қиын ғой?! - деп сауал салған ani_narra есімді тыңдарманына: «Нұрлаш екеумізді тек өнер байланыстырады. Ол - менің алтын досым», деп жазба қалтырған.
@esmahan_erke Кеше туған күнін тойлау үстінде Ерке ЕСМАХАН желіде кезекті жаңалығын жар салды. «Бүгін туған күніммен қатар болып жатқан бір қуанышпен бөлісейін! Бүгін мен «Нұр Отан» партиясына өтіп, партия билетін алдым. Еліміздің ең беделді, жетекші саяси партиясының қатарында болу - үлкен мәртебе!», - деп жазды ол инстапарақшасына.
Инста оқырмандары Ерке қызды қос қуанышымен мақтап жатса, ішінара партияға өтуін құп көрмейтіндер де табылды. Мәселен, ныспысы @zharkyn_1976.03 есімді тіркелуші: «Нұр Отанға өткенімізге он жыл болды. Ақшаны сенен алмаса, саған бермейді» деп сын жазған. Пікір қалдырғандардың ішінде «Аталмыш партияға кіріп жатсаң, мен шығып жатырмын», - деп билік партиясынан бас тартып жатқандар да табылды.
@kudaibergenov.dimash Ерке Есмахан партияға кіргенін мақтан етіп жатқанда, Димаш ҚҰДАЙБЕРГЕН қазақ тілінің сойылын соғып, үндеу жасады. Ол өзінің блогында әкесі Қанат АЙТБАЕВТЫҢ «Тілді дамытуға қосқан үлесі үшін» марапатқа ие болғанын жазып сүйінші сұрады.
Атасы мен әжесінің тәлімінде өскен бала әдептен аттамай, әкесі жайлы: «Менен сенің еліктейтін, үлгі тұтатын адамың кім деп сұраса, ойланбастан ағатайымды айтамын. Бізге үлгі болып жүре беріңіз. Қазақ тілі әлемдік тіл болуы керек. Қазақ тілін біле тұра, сөйлегісі келмейтін жастардың құлағына алтын сырға» деп жазды kudaibergenjv.dimash парақшасына.
Әлемді ерек даусына еліткен өнерлі жігіт туған тіліне деген құрметті осылай жеткізіпті.
@asha_matai Бұған дейін әнші әрі актрисалық қырынан танылған Аша МАТАЙ енді жеке кәсіппен айналысуға бел буды. Көрермен сынынан түспейтін «Қалаулым» шоу бағдарламасының жүргізушісі бизнесін жары Арман ҚОҢЫРМЕН бірігіп қолға алған. Олар балаларға арналған табиғи өнім сататын дүкен ашатын болыпты.
«Доромарин пайдалы. Біз оны үнемі қызымызға береміз. Бұл табиғи өнімді ішіп бастағаннан кейін оның иммунитеті жоғарылады» - деп журналистерге берген бұл жауабын жарнама есебінде инста парақшасына да түйреп қойыпты.
@bayanmaxatkyzy Ал БАҚ беттерінен түспейтін продюсер Баян МАҚСАТҚЫЗЫ ақпарат көздерін өзі жайлы көп айтады деп жазғырғанымен, отқа майды өзі құятынын тағы көрсетті.
«БАҚ менің қарапайым адам, ана, әпке және құрбы екенімді ұмытқан тәрізді. Мен олардың көзі мен талқысына көп түсетін «ХАЙП» есебіндемін. Менің бар болғаным қандай жақсы, ендеше іліп әкетіңдер, мен тұрмысқа шығамын. Енді мұны қанша БАҚ-тың жария қылатынын санаңдар», деп жазба қалтырды.
@saltanat_bakaeva Театр мен әншіліктің жүгін арқалап жүрген Салтанат БАҚАЕВА демографияға өз үлесін қоспақ. Бұған дейін екі ұлды дүниеге әкелген ол - үшінші сәбиін күтіп жүр. Қазақтың саны бір Салтанаттың баласымен көбейіп кетпесі анық. Дейтұрғанмен, оның сахна мен аналық міндетті қатар арқалап жүруі көңілге қуаныш ұялатады. Театр сахнасында Джульеттаны нақышында сомдайтын Салтанат екі ұлдың соңынан қыз Жібекті дүниеге әкелуді армандайтын болар.
Фото: Instagram.com
