Қазақтар кредитке батып қалыпты, тегін кредит берейік демейді
Өткен екі аптада банктерге қатысты бірнеше пікір оқыдым, 11,3 тиынымды қоса кетейін.
Пікір: Біздің банктер шаршатты, шетелдік банктер тезірек келсе екен.
Келсе де айтарлықтай өзгеріс болмайды. Шетелдіктер бизнес жасауға келеді. Олар үшін біздің нарық қосымша клиент қана. Қазақтар кредитке батып қалыпты, тегін кредит берейік демейді. Қызмет көрсету сапасы жақсарады деген де аңыз. Заң, оларға берілетін мүмкіндік, нарықтағы жағдайлар, олар жұмысқа алатын қызметкерлер ортақ болғандықтан, алғаш келгенде жарнамасы үшін жалаулатар, бірақ, бәрібір біздің банктердің деңгейіндей-ақ болады.
Пікір: 4 банкке мемлекет қолдау көрсетті, банктер өз кезегінде 1 млн теңгеден төмен кредитті кешірсін.
Мұндай пікірдің бірден қолдау табарына күмән жоқ. Тіпті осы пікірді жазған адам қайраткер болып шыға келсе таңғалмаймын. Мемлекеттен қолдау алған банктер тіпті кешіргісі келсе де, кешіре алмайды. Өйткені бөлінген қаражаттың мақсаты бөлек. Кешіру үшін заңға өзгеріс енгізу керек. Мақсатты қаражат бөлуі керек. Бірақ мұндай ешқашан болмайды. Кешіруі керек деген ойдағы адам көп болса, біз ешқашан алға жылжымаймыз. Болмауы да керек. Экономист, қаржыгерлерден себебін сұраңыз.
Пікір: Банк не үшін комиссия алады?
Банктер тегін қызмет көрсетуі керек деген пікірлерді көп оқимын. Латынға аударатын конвертор ғана тегін болуы керек деп санаймын))) Банктер не үшін комиссия алмауы керек? Банктер жалақы төлеуі, жалға ғимарат алуы, қаражатты тасымалдауы керек, ІТ шешімдер, осы сияқты толып жатқан шығындар бар. Ақша тауар. Банк оны көбейту, сақтау, сату, айырбастау, қарызға беру бойынша қызмет көрсетеді. Бұлар үшін комиссия алуға құқығы бар. Нарық заманында өмір сүріп, тегін болуы керек деген талап сәл «нелеу».
Пікір: Банктер қайырымдылық көрсетпейді
Қазақстанда әлеуметтік жауапкершілігі жағынан ең бірінші орында банктер. Яғни, ең көп қайырымдылық көрсететін банктер. Бірақ ол көп жағдайда айтылмай істеледі. Өйткені БАҚ-на жіберсең мұндай материалды жарнама дейді. Мынандай қайырымдылық істедім деп жарнама беру адамдар арасында күлкі, сенімсіздік тудырады. Сондықтан, айтыла бермейді, жазыла бермейді. Бұл тақырыпты зерттеп, сараптап жазған ешкімді көрмедім. Бірақ, банктер қайырымдылыққа көңіл бөлмейді дегенді көп оқимын. Әлеуметтік жауапкершілігі жоғары компаниялар тізімін жасаңыздар. Бәрі анық болады.
Дереккөз: Ербол Азанбектің Fasebook-тағы жеке парақшасынан алынды. Автордың рұқсатымен жарияланды.
Фото: inform.kz
