Журналистер облыс әкімінің баспасөз қызметі жетекшісінен отбасылық бизнесі туралы сұрағанда оның денсаулығы кенеттен нашарлап кеткен
Мемқызметкердің айтуынша, әйелінің тендер ұтып алуына қызметтік мансабының еш септігі тимеген.
Әйелінің бизнесі туралы сұрақтан соң денсаулығы нашарлаған мемқызметкердің ОҚО әкіміне қандай қатысы бар?
Оңтүстік Қазақстан облысында ақпараттық сала арқылы мемлекеттік тапсырыстарды кімдер алып отыр? Қыруар қаржыға бөлінген тапсырыстар қай деңгейде орындалуда?
Бір қызығы, аймақ басшысы Түймебаев мырзаның басты "пиарщигі" Бейсенбай ТӘЖІБАЕВ жары Жанар Мамайқызының қанша тендер алып, мемтапсырыс арқылы алған қаржы көлемін білмеймін деп ат тонын ала қашты.
Мемлекеттік тапсырыс арқылы қалтасын қалыңдатып отырған Мархабаева ханымның атында "Астана Times" деген атпен тіркелген жеке кәсібі бар. 2017 жылы "Астана Times" ЖК ОҚО ішкі саясат басқармасы арқылы ақпараттық саясатты насихаттау мақсатында 2 млн 400 мың теңге көлемінде тендер ұтып алған.
Іскер әйел үшін бұл тендерді ұтып алу оңайға соқпаған секілді. Алғашында "Астана Times" тапсырыс берушінің талабына сай келмеуіне байланысты жеңіске жете алмайды. Бірақ көп ұзамай арнайы шақырту арқылы бағы сыналған мекеме конкурс жеңімпазы боп шығады. "Астана Times" мекемесіне «Қаз дала» ақпараттық агенттігі тіркелген. Онда расымен де әкімдіктің жұмыстарын насихаттайтын "мақтаулы" ақпараттар жария етілген. Тек ол ақпараттар тендер алған әйел азаматының күйеуі жетекшілік ететін баспасөз қызметі таратқан баспасөз релиздері екенін айта кету керек. Ал ішкі саясат басқармасы мен тапсырысты орындаушы арасындағы келісімшартта тендер тапсырмалары авторлық ақпараттар болуы тиіс деп тайға таңба басқандай көрсетілген.
Сондай-ақ, kazdala.kz сайттың zero.kz-гі рейтингі өте төмен. Шамасы бір күн ішінде бұл сайтқа кірген біз ғана болдық. Әйткенімен, оқырманы болмасада кейбір мақалалардың оқылымы он мыңға жеткен.
«Шығарып жүрген журналдар, бұрыннан да қатысып жүр ғой тендерге. Шектеу жоқ оған. Менің облысқа келуімнің соншалықты қатысы жоқ. Мен көмектескен жоқпын. Не үшін көмектесем? Көмегім жоқ, әрине. Сен менің отбасыма қатысты нәрселерге неге сонша қадалып алдың? Жетеді ғой басқа "темалар". Бір-бірімізге сөйтіп шұқылап тиісуіміз керек пе міндетті түрде? Әріптеспіз бір- бірімізбен. Сен келесің де маған қадалып, анау не, мынау не деп... Екеуміз әріптес ретінде, кәсіби тұрғыда жақсы араласамыз. Қазір ауырып тұр едім, енді одан бетер.." деген Бейсенбай Тәжібаевқа әйелінің бизнесі туралы қойылған сауал шымбайына батқан секілді.
Жанар Мархабаеваның ОҚО әкімдігінен мемлекеттік тапсырысты жолдасының әкімдіктегі қызметке отырған соң алуы да күдік туғызды. Ашық дереккөздерде бұған дейін Жанар Мамайқызының мемтапсырысты орындағаны туралы мәліметті таппадық. Дәл өткен жылы Жанар Мархабаева Ақтөбе облыстық статистика департаменті арқылы 1 млн 018 мың теңге көлемінде тендер ұтып алғанын айтпай кетуге болмас. (Анықтама: 1. 018 млн теңге - ол лот құны. ЖК Астана Times байқауға 2018 жылы қатысқанда ең төмен баға ұсынған - 244 733 теңге)
Бейсенбай Тәжібаевтың жұбайы Астанадағы «Керемет Kids» балалар журналының редакторы болып шықты. Бұл мәліметті редакциядағылар растап, тіпті ұялы байланыс нөмірін де берді. Журнал редакторы Жанар ханымға хабарласып, сауалымызды қойғанымызда ол өзін Жанар емес, Айгүл есімді әйел азаматы деп таныстырды.
Жанар Мархабаева қызмет ететін «Керемет Kids» журналы «Керемет Баспа Үйі» ЖШС-іне тиесілі. Бұл серіктестік тек былтыр ОҚО әкімдігінен 6,6 млн теңге көлемінде мемлекеттік тапсырыс алған екен.
P.S. Еске сала кетсек, былтыр ОҚО әкімдігіне қарасты ішкі саясат басқармасының басшысы Болатбек Төлеген мемлекеттік тапсырыс аясында бопсалау арқылы 2,1 млн теңге көлемінде пара алды деген күдікпен істі болды. Журналистермен тікелей жұмыс жүргізетін шенеунік сонау елордадан келген қонақтар қатысқан ауқымды іс шара соңында құзырлы орган қызметкерлерінің құрығына түскен еді. Бүгінде шенеунік ісіне әлі нүкте қойылмады.
Сол жақта Болатбек Төлеген, он жақта Бейсен Тәжібаев.
Соңғы екі айдан бері Ratel.kz ОҚО әкімдігінен ішкі саясат басқармасы арқылы үлестірілген мемлекеттік тапсырыс алушылар туралы мәлімет алмақ болып хат та жіберген. Алайда жергілікті билік бұл мәліметтерді барынша құпияда ұстауға тырысып бағуда. Алғашында облыс әкімдігіндегілер бізге тендер алушылар тізімі мемлекеттік сатып алу туралы ресми сайтта көрсетілген деп редакция сауалына жауап беруден бас тартты. Ал екінші жолы біз орындалған жұмыстар тізімінің көшірмесін жіберу туралы сауалмен арнайы хат жолдадық. Одан бері бір айдан астам уақыт өтті, облыстық әкімдіктегілер редакция жіберген хатқа жауап беруге асығар емес.
Мақала Ratel.kz сараптамалық қызметінің қатысуымен әзірленді.
