Павлодарда ауылшаруашылық жұмысшылары мерекесі қарсаңында, сала басшысы қамауға алынды
Сенбі күні 18 қарашада қалалық №2 соты Павлодар облысы ауылшаруашылық басқармасының басшысы Ораз ДҮЗДЕНБАЕВТЫ екі айға қамау туралы үкім шығарды. Ол пара алды деген күдікпен қамауға алынды.
Шенеунікті Сыбайлас жемқорлыққа қарсы іс-қимыл ұлттық бюро қызметкерлері ауылшаруашылық жұмысшылары күні қарсаңында ұстаған. Мерекеге орай арнайы шаралар жоспарланыпты. Күндізгі ресми шарада: көрме, мерекелік баяндама, марапаттау рәсімі мен концерт болады делінген. Ал кешке қаладағы ең күшті мейрамхана «Ақ Отауда» Дүзденбаев бастаған мемлекеттік қызметкерлер кәсіби мерекелерін жақсылап атап өтпек болған. Бұл банкеттің шығынын субсидия алған қожалық иелері мойындарына алып, әрқайсысы шамамен бір миллион теңгеден шығаруы керек болыпты. Алайда, О. Дүзденбаев кәсіби мерекесін атап өте алмастан, уақытша тергеу абақтысына қамалған.
Сотта мемлекеттік субсидия алушылар мен Дүзденбаев арасында заңға томпақ келетін қаржылық бір байланыстардың болғандығы анықталды.
Жемқорлыққа қарсы бюроның мәліметінше, Дүзденбаев «БИК» шаруа қожалығының басшысы Қуаныш БАЙМАҒАНБЕТОВТАН 200 мың теңге пара сұратқан. 15 қараша күні оған аталған соманың жартысын әкеп берген. Ақша Дүзденбаевтың орынбасары арқылы кеңесшіге берілген.
Кеңесшінің кабинетінен тінту кезінде антикоррупциялық қызмет өкілдері 4,5 миллион теңге тауып алған.
Ораз Дүзденбаевты қорғаушы тарап бұл қаражат ауылшаруашылық өнімдерін шығарушылар музейіне көмек ретінде берілген ақша дейді. Ал жемқорлыққа қарсы бюро: бұл субсидия алуға өтініш білдірген шаруа қожалықтарынан жинап алынған миллиондар деген болжамдарын алға тартады.
Қазір жемқорлыққа қарсы бюро ауылшаруашылық басқарма басшылары мен «КазАгроМаркетинг» мекемесінде және басқа да адамдарға қатысты тергеу жұмыстарын бастап кетті.
Бұл істе фермерлер мен қожалық иелерінен субсидия беруде жүйелі түрде алым-салық алынып тұрған деген болжам жасауға негіз бар.
Бір ғана 2017 жылы фермерлерге 12,7 миллиард теңге бөлінген.
Қылмыстық істе аты аталып отырған «БИК» шаруа қожалығы құжат бойынша 80 миллион теңге алған.
