«Электрондық күнделік» толтырмағаны үшін Алматы облысында тоғыз мұғалімге ресми ескерту жасалды
Кеше ғана «Күнделіктің күйбеңі» атты мақаланы жариялағанымыз сол еді, Facebook – тегі «Қазақстан ұстаздары» тобында электронды күнделікті уақытысында толтырмағаны үшін мұғалімдерге ескерту беріле бастады деген ақпарат тарады.
Алматы облысы, Жамбыл ауданына қарасты Қайназар ауылының №2 орта мектебінде электронды күнделікті толтырмаған 9 мұғалімге ресми түрде ескерту жарияланды. Бұл туралы Қарасай ауданы, Жаңатұрмыс мектебінің ұстазы Айман САҒИДУЛЛА хабарлады.
«Мұғалімдерге ескерту беріп жатыр екен. Салтанат Бақбергенова ханым! Мектебіңізге интернет орнатып, сыныптарға компютер беріңіз. Содан кейін ғана сөгіс, ескерту берерсіз. Бұл мәселені министрлікке жолдайтын боламын», деп жазды ол Facebook-тегі өзінің жеке парақшасында.
Кешірек Алматы облысы, Жамбыл аудандық Білім бөлімінің басшысы Лайлаш Бакирова: «Курметти Айман Сагидоллакызы! Кайназар орта мектеби жана оку жылында ашылган мектеп , интернет желисине косылган мемлекет тарапынан! Электронды журналга аудан бойынша 37мектеп косылган», деп жауап берді жазбаның астында пікір қалдырып.
Мектептің мөрі басылған бұйрықтың көшірмесі әлеуметтік желіге жарияланысымен-ақ, ұстаздар мен қарапайым азаматтар арасында қызу пікірталас орнады. Қайназарлық тоғыз мұғалімге «электронный күнделікте тақырып, үй жұмысын, жоспарлау және тапсырма беру бойынша толтыру жұмысын жүргізбегені үшін» ескерту жасаған мектеп басшысы Салтанат СУЛЫБЕКОВАНЫҢ бұл әрекетін әркім әрқалай бағалауда.
Басшылық тарапынан ресми ескерту алған әріптестерін қолдап, «интернет жоқ болса, электронды күнделікті қалай толтырмақ?» дескен ұстаздарға Назира Батанова деген қолданушы жағдайды барынша түсіндіруге тырысыпты. Ол: «Істің мəн-жайын білмей олай деу бекер. Бұл істі дұрыс түсінбегендіктен олай демеңіздер.Бұндай жағымсыз ақпарат таратканша мектептің жеткен жетістіктері, оқушылары-мыздың алған жүлделерімен, сəтті күндерімізбен неге бөліспеске» деп жазды.
Десе де, әр аймақтан пікір жазған азаматтардың басым бөлігі мұғалімдерге жасалған ескертуді қисынсыз деп, ал бұйрық мәтініне байланысты «Балаларға обал. Бұйрықтағы қателерге қарағанда білім жоқ деуге болады мына мектепте! Қайдағы күнделік!» деген сыңайда пікір білдіруде.
Осыған қарағанда, кundelik.kz сайтының жыры таусылар емес.
