Шолпан ауылындағы «А» гепатитінің таралуына жергілікті дәрігерлер кінәлі болып шықты
Сәрсенбі күні, 24 қаңтарда Өскеменде ШҚО әкімі орынбасары Әсем НҮСІПОВА мен денсаулық сақтау басқармасының басшысы Марат ШОРАНОВТЫҢ қатысуымен баспасөз мәслихаты өтті.
Шенеуніктер Үржар ауданына қарасты Шолпан ауылындағы «А» гепатиті шыққан эпидемиологиялық жағдай туралы баяндады. Ауылда сары ауруға ондаған бала шалдығып, бір оқушы қайтыс болған еді. Қайғылы жағдайға орай республикалық комиссия құрылып, жұмыс жасаған болатын. Жиынға қоғамдық денсаулық сақтау департаментінің басшысы Ғазиз СҮЛЕЙМЕНОВ және комиссияға жетекшілік еткен Нұрланғазы ИБРАЕВ та қатысты.
Комиссия құрамына ҚР Денсаулық сақтау министрлігінің мамандары, инфекциялық және паразиттік ауруларды эпидемиологиялық мониторингілеу департаменті өкілдері,С. Асфендияров атындағы Ұлттық Медицина университетінің балалар жұқпалы аурулары кафедрасының ұстаздары да кірген.
- Комиссия жұмысын аяқтады. Гепатит тарамаған. 2017 жылдың қыркүйегі мен 2018 жылдың қаңтар аралығында сары ауруға шалдыққандармен қарым-қатынаста болған 46 бала тексерістен өткізілген. Аудандық аурухананың жұқпалы аурулар бөліміне 25 бала жатқызылған. Тек солардың 12-сі ғана «А» гепатитіне шалдыққаны анықталған. Бұл ресми мәлімет. Және тағы 19 баладан анықталғанымен ол мәлімет жасырылып қалған. Халықтан ауруханаға өзіміз барып, ем-домға ақшаны қалтамыздан жұмсадық деген шағымдар түсті. Жалпы, Үржар аудандық аурухана басшылығы өз жұмыстарын дұрыс атқармаған. Оларға қатысты шарала қолданатын боламыз, - деді ШҚО денсаулық сақтау басқармасы басшысы Марат ШОРАНОВ.
Баспасөз мәслихатын өткізушілер орталық аурухананың бас дәрігері БАҚ-на бұрыс мәлімет беріп, «А» гепатитіне қатысты мәселе ушығып кетті дейді. Ал Шолпан ауылындағы қыз баланың өліміне қатысты тергеу жұмыстары жүріп жатыр екен.
- Аудандық ішкі істер бөлімінде қылмыстық іс тергеліп жатыр. Комиссия жинақтаған барлық құжат сол жаққа жөнелтілді, - деді Нұрланғазы Ибраев.
- Қайтыс болған баланың өлімі сары аурудан болмауы мүмкін деп мамандар тұспалдап отыр. Дәрігерлер осыны да айта кетулері керек еді. Баланың өліміне қауіп төндірген басқа вирустардың да формасы болған. Нақты қорытынды зерттеу аяқталғанда шығады. Бас дәрігердің біліксіздігі осы жағдайға әкеп соғып отыр. БАҚ-нан сұрайтынымыз сіздерге қандай да бір ақпарат түссе тиісті органдарға хабарласыңыздар. Ақпаратты анықтап алу үшін, - деді ШҚО әкімінің орынбасары Әсем Нүсіпова.
Қысқасы, шенеуніктер Шолпан ауылында даурығатындай дәнемеде болған жоқ. Жағдай толық бақылауда. Барлығына аудандық аурухананың бас дәрігері Жексенбай ТІЛЕУБЕРЛИН жазықты болып шығыпты. Республикалық телеарналардың біріне «А» гепатитіне шалдыққандар саны 49 деген дәрігер кінәлі екен.
Фото автордікі.
