Павлодар облысында физика пәні мұғалімі оқушы қыздан алтын бұйымдарды алдыртып, ломбардқа өткізгені үшін істі болды
Екібастұзда Абай Құнанбаев атындағы №2 орта мектебінің мұғалімі Алмагүл АВДОЛХАН ақыры жұмысынан қуылып тынды. Бұл туралы Павлодар облыстық білім басқармасы басшысының міндетін атқарушы Жомарт ҚАРАМБАЕВ хабарлады.
"Бұған дейін денсаулығына байланысты уақытша жұмыстан босатылған Алмагүл Авдолхан бұдан былай оқиға орын алған мектепте қызмет етпейді. Жалпы, ұстаз мұнда биыл қыркүйек айында орналасқан", - деді Жомарт Қарамбаев.
Сынып жетекшісіне жаны ашып, қол ұшын беремін деп басы дауға қалған 11 сынып оқушысы қазір үйінде ем-дом қабылдауда. Оның анасы Баян СӘРСЕКЕЕВАНЫҢ айтуынша, қыз бала осы аралықта күйзеліске ұшырап үлгерген. "Қызымның басы ауырады. Тәбеті де жоқ. Ұстазының "анам хәл үстінде жатыр" деген сөзіне иланып, өзінше көмектеспек болған. Сөйтіп, алданып қалған. Қазір ауруханадан анықтама алып, үйде емделіп жатыр. Өзіне келген соң сабаққа барады, - дейді ол.
Ал 29 жастағы Алмагүл Авдолханның бағалы бұйымдарды анасының сырқаттануына байланысты уақытша алғанын алға тартты. "Мен қайтарып беру ниетіммен ғана қарызға алдым 20 күнге. Оны уақытында қайтарып бердім. Ешқандай басқа зорлап оны күшпен қолынан тартып алған жоқпын. Келісімімен ғана алдым, қайтарып бердім. Анасына бәрін түсіндірдім. Кешірім сұрағам. Анамның денсаулығына байланысты алдым, - деп ақталды ол.
Бағалы бұйымдары түгел қайтарылғанымен Баян Сәрсеекева Екібастұз қалалық прокуратурасына шағым түсірген. Айтуынша, мұндай жайтқа жол берген ұстаздың балалармен жұмыс істеуі қауіпті. Кәмелет жасына толмаған қызының күйзеліске ұшырағанын алға тарқан ата-ана енді оны бұл қадамға итермелеген сынып жетекшісін білім саласында еңбек ету құқынан айыруға ниетті. Ал оның білім саласында қызмет етуге хақы бар-жоғын енді тек сот шешеді.
«Мектеп мұғаліміне қатысты бүгінгі күнде сотқа дейінгі тергеу жүргізілуде. Күдікті тұлғаға бүгінгі күнде «Алаяқтық» бабы бойынша кінә артылып отыр. Ол өз кінәсін мойындап отыр, - деді Екібастұз қаласы прокуратурасының баспасөз хатшысы Файзолла ЖАНАБАЕВ.
Еске сала кетейік, мұғалім сырқат анасының еміне қажет деп 11 сынып оқушысын алдап, алтын бұйымдарын алған. «Алтын қолына түскеннен кейін ол бұйымдарды ломбардқа өткізіп, 240 мың теңге алған», – деп хабарлаған еді ІІД баспасөз қызметі.
Ешкімді алдап-арбамадым деген педагогтың өзі мемлекеттік қорғаушы жалдап, кінәсіз екенін дәлелдемек.
