Қара шаңырақты саудалап-бөлшектеу кешірілмес күнә саналған
Қазақта “Қара Шаңырақ” деген қасиетті ұғым бар. Оның мәнісі – әкеден қалған мирасты жаның шығып кетсе де сақтап, қолдан келгенше кеңейтіп кейінгі ұрпаққа аманат етіп қалдыру. Осылайша буындар алмасқанда көрегенді әулет, даналық жолын ұстанған ұлт алға басып өркендеген. Керісінше Қара шаңырақты саудалап-бөлшектеу кешірілмес күнә саналған. Өйткені бұл дәулетті өмір-бақи маңдай терін төгіп, күресіп жинаған ата-баба алдындағы күнә ғана емес. Бұл ғасырлар бойы сақталып келген халық өміршеңдігінің бірізділігіне жасалған қиянат.
90-жылдардағы алмағайып заманда жеңіл жолмен жақсы өмірге жетуге әуездер сол әкеден қалған мұраны талан-таражға салған: бірі банкке кепілдікке қойды, бірі жалға берді, бірі сатты. Өз есімдегі сондайлардың қатарында оңған біреуі де жоқ. Шетінен жаман әдетке салынып түбі із-түссіз құрыды. Олардың ақылдсыздығы мен ата өсиетін ұмытқаны жақын туыстарына да шексіз қасірет әкелді.
Осының бәрін айтып отырғаным, бүгінгі Ата-Бабадан қалған қасиетті еншіміз – Туған Жерді қалай да сатуға не бөтенге жалға беруге жанталасқан, сол үшін түрлі қитұрқы әрекетке баруға дайын мешкейлер тағы бір сәт ойланса екен деймін. Қорыққаннан қазіргі қоғам үндемей қалатын да шығар. Тек Даңқты Бабаларымыздың аруағы мен Жер-Ана киесінің, келер ұрпақ көз-жасының қарғысы атары анық. Айтпады демеңдер.
Дереккөз: Расул ЖҰМАЛЫНЫҢ Facebook-тағы жеке парақшасынан алынды. Автордың рұқсатымен жарияланды.
Фото: dalanews.kz.
