СҚО облысында 2017 жылы 263 адам Қазақстанның төлқұжатын алған, олардың көбісі қазақтар
Солтүстік Қазақстан статистика департаментінің ақпаратына сәйкес өңірге жұмыс жасауға иммигранттардың көбі Ресей, Өзбекстан, Тәжікстан мемлекеттерінен келеді.
Шамұратовтардың отбасы СҚО, Қызылжар ауданы, Бәйтерек ауылына Өзбекстанның Науаи облысынан келген. Рузибой ШАМҰРАТОВ әйелі Бақыт МҰХАМЕДЖАНОВА екеуі 5 баланы тәрбиелеп отыр. Отағасының айтуынша, тұрақты жұмыс жоқ. Сондықтан да маусымдық жұмыстар жасауға тура келеді екен. Жазды құрлыс, қыста жолаушыларды тасымалдау. Алайда, тірлікке шағымым жоқ. Ерінбеген адам жан бағады. Жергілікті тұрғындармен де жақсы қарым-қатынаста күн кешіп келеміз дейді, Рузибой Шамұратов.
– Аллаға шүкір. Жаман емеспіз. Өзбекстандағы жағдайымыз жақсы еді. Атажұртта тамыр жаю үшін оралдық. Жалпы, Қазақстанда да жақсы өмір сүріп жатырмыз. Бұл елде балаларымның болашағы жарқын болады деп үміттенемін, - дейді Рузибой Шамұратов.
Атамекенге екі қызы және немересімен Ұлша АБДУНӘЗІРОВАДА келген. Олар мемлекеттік бағдарламасыз Қазақстанға қоныс аударған екен. Зейнеткер баспананың жоқтығы ғана қиындық тудырып отыр дейді.
– Әрине, қиын. Пәтер болса ешқандай проблема болмас еді. Ал былай күн көрісіміз жаман емес. Зейнетақыны алып отырмыз. Өзбекстанда да жаман тұрғамыз жоқ. Әйтседе, атамекеннің орны бөлек. Өз елімізге келдік. Мен Қазақстанды мақтан етемін. Суын ішкен Өзбекстан жайлы да жаман сөз айтпаймын, - дейді Ұлша Абдунәзірова.
Миграциялық полицияның мәліметінше 2017 жылы облыста Қазақстан төлқұжатын 263 адам алған. 77 – Өзбекстаннан, 41 – Ресейден келген. Олардың 162-і қазақ ұлтының өкілдері.
– Көбіне облысымызға Ресейден көшіп келіп жатыр. Қытай мен Өзбекстаннан келушілер де бар. 506 шетелдік тұрақты түрде тұру үшін СҚО келді. 166 адам қазақ, - дейді ішкі миграция бөлімінің бастығы Самат БАЗЫЛОВ (cуретте).
Қазақстанда тұрақты түрде тұру үшін келетіндердің саны өткен жылмен салыстырғанда артқан екен. Бұл ақпаратты статистика департаменті де растады. Қоныс аударушылардың саны болса азайған.
– 2017 жылдың 10 айының ішінде СҚО қоныстанушылардың саны 31,5 пайызға көбейді. Өткен жылы өңірден кетушілердің саны 3,3 пайызға көбейген болатын. 4755 адам кетіп қалған еді. Бұл көрсеткіш 18 пайызға азайды, - деді СҚО статистика департаменті бастығының орынбасары Қуанышбек ҚАЛИЖАНОВ.
