Сегіз адам дәрігерлердің көмегіне жүгініп, алты адам жан тапсырды
Шет ауданы жолында екі жеңіл көлік қақтығысып, салдарынан екі жүргізуші де көз жұмды. Мазда көлігі Жаңаарқа ауданынан шыққан такси болған. Оның ішінде үш ересек адам мен үш жасар қыз болған. Жүргізушісі оқиға орнында тілге келместен көз жұмды.
Ал, жүкті келіншек пен оның баласы жақын маңдағы ауруханаға жеткізілген. Өкінішке орай, әйел құрсақтағы баласынан көз жазып қалды. Ал, үш жастағы қыз дәрігерлердің айтуынша жансақтау бөлімінде ауыр халде жатыр.
«Екі ірі көлік апаты 14 ақпан күні кешке орын алған. Бес адам және бала ауруханаға жеткізілді. Әр қайсысы түрлі жарақат алған. Біреулерінің жамбастары сынса, екіншілерінің бас сүйектері зақымданған. Барлығына алдын ала ота жасалады. Үш жасар қыз баланың жағдайы ауыр, бас сүйегі зақымданып, маңдайында жарық бар, онымен қоса жамбастары сынған. Есін білгенімен, қатты күйзеліске түскен», деді дәрігер-травматолог Видади ДЖАМАЛЕДДИНОВ қандай да басқа болжам айтудан бас тартты.
Ал, қарама қарсы қақтығысқан «Приора» көлігінің жүргізушісі апат кезінде тірі болған. Куәгерлердің айтуынша, ол «Газель» көлігін, айналып өтпекші болып, қарама қарсы бағытқа шыққан. Ұшқын қардың салдарынан қарама қарсы келе жатқан көлікті көрмей қалған.
Екінші апат Шет ауданы тас жолында болған. Онда да екі жеңіл көлік қақтығысып, джип көлігі жолдан шығып кеткен. Төрт адамның өмірі қиылған апатта тергеу жұмыстары басталды. Қарағанды облыстық ІІД баспасөз қызметінің жетекшісі Бақытжан ҚҰДИЯРОВТЫҢ мәліметінше, екі оқиғаға қатысты қылмыстық іс қозғалған.
«Қарағанды облысы аумағында болған ірі көлік оқиғалары салдарынан алты адам қаза тапты. Сегізі ауруханалараға түрлі жарақаттармен жеткізілген. Қазір ҚР қылмыстық кодексінің 345 бабы, 4 тармағы бойынша сотқа дейінгі қылмыстық тергеу басталып, сараптама тағайындалды», деді ол.
Бұл айда облыста осымен үшінші ірі көлік апаты орын алып отыр. Өткен аптада Бұқар Жырау ауданында қақтығыс салдарынан «Мерседес» көлігінің жүргізушісі көз жұмған болатын.
Фото автордікі.
