Елімізде әлі де жеке табысын жасыруды жөн көретін жұлдыздар жетеді
Қаржы министрлігінің өкілі салық төлеуден жалтарып жүрген әншілердің есімін атады, деп хабарлайды «Еуразия» арнасы.
«Сіз мысалы 200-300 мың айлық аласыз, одан 30 мың теңге табыс салығын төлейсіз. Ал, бір тойда 300-400 мың теңге кем дегенде алып кететін әншілер, бір тиын да салық төлемейді Қазіргі уақытта бізде шоу-бизнеспен айналысатын 1725 заңды тұлға тіркелген. Олардың жұмысшыларының саны 2963 адам. Сонда жалпы алғанда 4688 адам жұмыспен қамтылып, қызмет атқаруда. Өткен жылға осы тұлғалар 59 млн табыс салығын, 46 миллиондай әлеуметтік салық төлеген», – деді ҚР қаржы министрлігі мемлекеттік кірістер комитетінің бас сарапшысы Олжас ОТАР.
Оның айтуынша, қазір әншілердің арасында салық төлеу мәдениеті қалыптасып келеді. Тіпті, арнайы рейтинг те бар екен. Мұнда да табыс табудан да, тапсырыс алудан да, ешкімге дес бермейтін Қайрат НҰРТАС көш бастап тұр. Былтыр 1 млн. теңгеден астам салық төлепті. Екінші орын Джах ХАЛИБТІҢ еншісінде (1 млн. теңге). Ешқандай кірісін жасырмайтын жұлдыздардың тізімін Айқын ТӨЛЕПБЕРГЕН мен Сәкен МАЙГАЗИЕВ түйіндейді.
Алайда шоу-бизнес өкілдерінің барлығы заңға бағынуға дайын тұрған жоқ.
Мәселен әнші Алтынбек ТӘШІМБЕТОВ күміскөмейлерге салық салуды әділетсіздік деп санайды; «Біз мемлекеттен ешбір көмек көріп отырғанымыз жоқ. Мен әнші ретінде мысалы өзімді таныту үшін қалтамнан қаражат шығарып, солай тыраштанып жүрмін.
Өзбекстанда мысалы, әндерің радиодан мен теледидардан тегін беріледі. Ал бізде жағдай жасамай тұрып, салық төле дейді». Әріптесін әнші Ділхан ИСАЕВ қолдап отыр. Оның айтуынша, мемлекет әншілердің табысын емес, әуелі шығысын есептеу керек.
Қайрат Нұртас – 7000 доллар
Төреғали ТӨРЕҒАЛИ – 4000-6000 доллар
Музарт – 4000-7000
Қыдырәлі-Қарақат – 6000 доллар
Мақпал ЖҮНІСОВА – 4000
Айқын - 2000-4000
Абай Бегей, Заттыбек – 3000 доллар.
Бүркіт пен Аиша жылына 1 млн долларға дейін табатын көрінеді.
Ал заң бойынша жылдық табысың 284 мың теңгеден асса салық төлеуге міндеттісіз.
Дереккөз: «Еуразия».
