Жалпы 90 мың алматылық салық бойынша 4 млрд теңге қарыз екен
Алматы қалалық Мемлекеттік кірістер департаменті көлік салығын төлемеген шоу-бизнес жұлдыздарын сотқа берді.
Департаменттің баспасөз қызметінің хабарлауынша, қазақстандық шоу-бизнес өкілдерінің арасында көлік салығын төлемегендер бар. Жұлдыздар 400 мың теңгеден аса салық төлемеген. Атап айтқанда, әнші Ернар АЙДАР - 205,1 мың теңге, Рано УМАРОВА - 88,8 мың теңге, Жеңіс ЫСҚАҚОВА - 73,2 мың теңге, Ерке ЕСМАХАН 41,1 мың теңге бюджетке қарыз екен.
«Бұл азаматтарға қатысты іс материалдары жинақталып, сот органдарына берілді. Сот органдары қарызды өндіру туралы үкім шығарды», - делінген таратылған баспасөз хабарламада. Салық қарызы туралы ақпаратты электронды сервис арқылы ҚР Қаржы министрлігі Мемлекеттік кірістер комитетінің kgd.gov.kz сайтынан көруге болады. Қалалық департамент 31 желтоқсанда 2017 жылғы көлік салығын төлеу мерзімі аяқталатынын хабарлайды. Айта кету керек, 2016 жылдан бастап көлік салығы төлеушінің тұрғылықты жері бойынша төленеді.
Жалпы, осы жылдың 5 желтоқсанындағы мәлімет бойынша 90 мың Алматы тұрғыны салық бойынша 4,2 млрд теңге қарыз. Оның ішінде 19213 борышкердің ісі сотқа жіберілді. 3 653 адамға шетелге шығуға тыйым салынды. 2849 адамның мүлкіне тыйым салынды.
Дереккөз: ҚазТАГ
Фото: inform.kz
