Бұл оқиға бойынша қылмыстық іс қозғала ма?
Қаңтардың 17-сі күні Алматы облысы, Боралдай кентіндегі №15 мектептің мұғалімі Гүлзира БАЙДІЛДАЕВАНЫ оқушысының шешесі мен әпкесі соққыға жығып, соның салдарынан мұғалім ауруханаға түскен болатын. Осы оқиға бойынша жергілікті құзырлы орган өкілдері Әкімшілік құқықбұзушылық бойынша іс қозғалды деп мәлімдеді.
Алайда қазақстандық ұстаздар қауымы мен азаматтық қоғам өкілдері оқушысының анасынан аяусыз соққы алған мұғалімге қатысты әкімшілік іс емес, қылмыстық іс қозғалуға тиіс деп тиісті мекемелерге ресми хат жолдады.
ҚР Бас прокуратурасының, Білім және ғылым министрінің, Қазақстандық білім және ғылым қызметкерлері кәсіподағының атына жолданған бұл хатта азаматтар соққыға жығылған мұғалімді қорғауға және осы істі назарға алуды сұрады және «Елімізде осы кезге дейін мұғалімді қорғайтын арнайы заң жоқ. Мұғалімдер ата-анамен оқушының алдында дәрменсіз күйде қала береді» деп, тиісті мекеме өкілдерінен ұстаздардың құқығын қорғайтын арнайы заң шығаруды да талап еткен болатын.
Ұстаздар қауымы мен азаматтық қоғам белсенділерінің бұл хатына Қазақстандық салалық білім және ғылым қызметкерлері кәсіподағы Facebook парақшасында жауап берді.
«Қазақстандық салалық білім және ғылым қызметкерлері кәсіподағы Алматы облысы Іле ауданы Боралдай кенті К. Әзірбаев атындағы №15 орта мектебінің мұғалімі Г. Байділдаеваның оқушысы Н.П. Митрошенконың анасы мен әпкесі тарапынан соққыға жыққаны туралы оқиғаны өз назарында ұстап отыр.Туындаған мәселеге байланысты салалық кәсіподақтың Алматы облыстық ұйымының төрағасы А. Омашевқа арнайы тапсырма берілді. Істі жүргізіп отырған құзіретті орган қызметкерлерімен жергілікті кәсіподақ ұйымы байланыста болып, істің сәйкесінше тиісті деңгейде жүргізідуін жіті қадағалауда. Сала кәсіподақ ұйымы зардап шегушінің ем-домына 50 000 теңге көлемінде қаржылай көмек және еңбекке жарамсыз парақшасының төлемін жалақының толық мөлшерінде берілетін болады. Өйткені зардап шегуші жарақатты жұмыс уақыты кезінде және зардап шегушінің кабинетінде алған», делінген жауап хатта.
Алайда кәсіподақ өкілдері мұғалімнің соққыға жығылуына байланысты қылмыстық іс қозғалсын деген азаматтардың талабына қатысты өз жауаптарында ештеңе айтпаған.
Сонымен қатар, ҚР Бас прокуратурасы және мен Білім министрі Ерлан САҒАДИЕВ осы оқиға орай ұстаздар мен белсенді азаматтардың хаттарына бүгінге дейін ресми түсініктеме берген жоқ.
Фото: Facebook.com.
