Шу тудырған оқулықтың авторы көпшіліктен кешірім сұрады
Назарбаев зияткерлік мектептеріне түсушілерге арналған тест тапсырмалары жинағының авторы Серікболсын ДҮЙСЕМБАЙ Facebook әлеуметтік желісінде көпшіліктен кешірім сұрады.
8-сынып оқушыларына арналған оқулықта МС Сайлаубек жайлы сұрақ бар. Кітаптың 75-бетінде ақтөбелік МС Сайлаубек туралы қысқаша мәлімет беріліп, төмендегідей сауал қойылған.
МС Сайлаубектің жұлдыз болуына не әсер етті?
A. Білікті ұстаздан дәріс алуы
B. Бішкек арналарында сұхбат беруі
C. Ресейде концертте ән шырқауы
D. Түрлі деңгейдегі арналарға түсу үшін
Бұл оқулық туралы ақпаратты кеше Facebook.com әлеуметтік желісінде Айдын ЖАНАТ есімді азамат таратқан еді. Желі қолданушылары оқулықты сынға алған-ды.
-Талай 100 мың данамен шығып жүрген, ішінде қаншама қателіктер өріп жүрген оқулықтарды да көзіміз көріп жүр. Ал біздің ресми емес, тек емтиханға дайындыққа арналған Қазақ тілінен бар-жоғы 100 дана тесттер жинағының ішіндегі 5-6 жолымыз қаншама балағат, ғайбат сөздерге алып келді. Бірақ, бұл жолдар келесі басылымда ауыстырылып, түзетіліп үлгерген еді. Және бұл тест жинағы ешқандай ресми бекітілмеген, мектеп бағдарламасына енбеген.
Мен бұны ақталу үшін де, мақтану үшін де жазып отырған жоқпын. Тек біздің қоғамның кейбір “белсенділері” мәселенің мән-жайына барып алмай, тек алып-қашпа әңгімеге еріп, жерден жеті қоян тапқандай жарыса бөлісе кететінінен Әлем көшіне ілесудің ауылы алыс па деп қалдым.Титтей “қателігі” үшін Өз ұлын өзегінен тепкендей көрінген елге енді оралғың да келмей қалады екен.Елден кешірім сұрадым. Ел үшін "Құрбан болуға дайынмын". Оған рухым жетеді, - деп жазды Серікболсын Дүйсебай өз парақшасында.
Фото: qamshy.kz.
