Сабыржан Дәуітбергеновтың қызметтік кабинетіне жасырын камера қойылып, ол жердегі әңгімелер таспаланған
Қарағандыдағы Қазыбек би аудандық сотында «Жер қатынастары, сәулет және қала құрылысы бөлімі» мемлекеттік мекемесінің бұрыңғы басшысы Сабыржан ДӘУІТБЕРГЕНОВКЕ сот үкімі шықты.
Естеріңізге сала кетейік, шенеунік былтырғы жылдың 14-ші шілдесінде жұмыс кабинетінде пара алып жатқан жерінен ұсталған болатын. Сол кезде тараған ақпаратқа сүйенсек, мемлекеттік қызметкердің кабинетінде жасырын болып, оның қылмыстық әрекеттері таспаланған еді.
Дәуітбергеновтың ұсталуы біраз жұртты әбігерге салды. Себебі оның «қызметіне» жүгінгендер мен делдалдар қатары аз емес-ті. Сондықтан да камера жайлы әңгіме бас сәулетшіні жағалағандарды алаңдатып тастаған. Қылмыстық істе дәйек ретінде флэш-карттардың көп болғанын ескерсек шенеуніктің жұмыс бөлмесінде жасырын камерының болғанына шәк келтірмеуге болады.
Жасырын камераның объектісіне пара алу фактісі ең алғаш 2017 жылдың 29 мамыр күні түсіп қалған. Сағат 10.30 шамасында Қарағанды қалалық «Жер қатынастары, сәулет және қала құрлысы бөлімі» мемлекеттік мекемесінің №407 кабинетіне шенеунікке «Eurasia Building» ЖШС жұмыс жасайтын МҰҚАШЕВ атты ескі танысы келеді. Ол «Орбита-1» шағынауданында салынған нысанды тезірек эксплуатацияға өткізу мәселесін қарауда оң қабақ танытуды сұрады. Әрине, аздаған сыйақы боларын да айтқан. Мұқашев ұсынысы қабылданады. Арада бір сағат өткеннен кейін Мұқаев бас сәулетшінің қолына 50 мың теңге беріп кетеді.
2017 жылдың 9-шілдесінде сағат 11.00-де Дәуітбергеновтың есігін СМАЙЛОВА есімді танысы қағады. Ол бір кәсіпкер атынан «елші» болып келгендігін айтып, Сейфуллин даңғылындағы сауда павильонындағы жердің арендасын ұзарту туралы арызға оңды шешімді сұрайды. Қарағанды қаласының бас сәулетші «өтінішті» жерге тастамайды. Сол күні сағат 16.00-де өз жұмыс кабинетінде Смайловадан 10 мың теңге алады. Және Смайлова тағы бір өтінішін айтады. 2017 жыл 9-шілде күні жазылған «Күнгеу» шағын ауданындағы нысанаға қатысты арызын оң көзбен қарауды өтінеді. Көңілшек шенеунік бұл сөзді де жерге тастамай 20 мың теңгеге ие болады.
2017 жылдың 30 маусымында 12.30 шамасында Қарағандының бас сәулетшісіне КӨКІМБАЕВ есімді азамат келіп, жер телімін көбейтіп беру туралы бұйымтайын айтады. Көкімбаев бұйымтай құнын 100 мың теңгеге бағалайды. 2017 жылдың 14 шілдесінде Сабыржан дәуітбергенов Көкімбаевтан 80 теңге пара алады. Осыдан кейін шенеуніктің бөлмесінде антикоррупциялық ведомствоның өкілдері тінту жұмыстарын жүргізеді.
Алайда, айыпталушы сотта тергеу кезінде берген кәулік еткен сөздерінен,мойындаған істерінен бас тартып, ешқандайда ешкімнен ақша алмағанын айтып отырып алды.
Айтуынша, бұл қылмыстық іс тапсырыспен қозғалған.Тергеу кезінде өзіне қысым жасалғанын да айтты. Дәуітбергенов Мұқашевтан пара емес қарызға 50 мың теңге алғанын айтса, Мұқашев та тергеушілердің қыспаққа алғанын айтып тұрып алды. Куәгер Смайлова Дәуітбергеновке ешқандай да ақша берейін деп жүрмегендігін мәлімдеді.Бар-жоғы жас мамандардың құжатты қатесіз толтырмауын қадағалағаны үшін иіс су сыйламақ болыпты-мыс. Алайда, абайсызда бас сәулетшінің столының үстіне 10 мың, сосын 20 мың теңгені тастап кеткен.
Көкімбаев болса сотта түсінік беруден бас тартты. Айтуынша, олар үшін өзі қылмыстық жауапкершілікке тартылуы мүмкін. Және Дәуітбергеновке пара бермегенін айтты.Сот кәугерлердің басқаша сайрауын шенеунікті қылмыстық жауапкершіліктен арашалау әрекеті деп қабылдады. Сонымен қатар, барлық дәлел таспаланған болатын.
Қысқасы, судья Дәуітбергеновты ҚК-тің 366 бабы, 3 бөлімінің 4 тармағы бойынша айыпты деп тауып, 11,2 миллион теңге айыппұл салды. Және өмір бойы мемлекеттік қызметте істеуіне тыйым салды.
