Солтүстік Қазақстан облысының әкімі Құмар Ақсақалов Наурызды тойлау барысында киіз үйлерді жауып алып, тамақ ішуге тыйым салды
Солтүстік Қазақстан облысының әкімі Құмар Ақсақалов Наурызды тойлау барысында киіз үйлерді жауып алып, тамақ ішуге тыйым салды, деп хабарлады агенттік тілшісі.
«Киіз үйлерді жауып алып, тамақ ішкенді қою керек», - деп қадап айтты ол дүйсенбі күні әкімдіктегі отырыста.
Қ.Ақсақаловтың айтуынша, белгілі бір қонақтар үшін киіз үйлерді жауып алғанда халық арасында «олар неге жабық және оның ішінен кімдер тамақтанып жатыр» деген сұрақ туындайды.
«Ол жерде көп балалы аналар, ардагерлер және мүмкіндігі шектеулі адамдарға тамақ берілген. Менің ойымша, оның бәрін мейрам қарсаңында жасауға болады. Барлығы ашық болуы керек. Киіз үйлер ұлттық нақышта безендіріліп, салт-дәстүрлерімізді айқындап тұруы тиіс. Есікті жауып алып тамақ ішудің қажеті жоқ. Ол жерде көп балалы аналар, ардагерлер және мүмкіндігі шектеулі адамдарға тамақ берілуі тиіс. Бірде бір көше жабылмасы», деп талап етті өңір басшысы.
Сонымен қатар, облыс әкімі аудан әкімдеріне облыс орталығына келудің еш қажеті жоқ екенін қадап айтты..
«Шығармашылық ұжымдар өз әкімдерімен бірге жергілікті жерде болуы керек», - деді Қ.Ақсақалов.
Сондай-ақ, ол үш күн бойына халық көп жүретін жерлерде киіз үйлердің құрулы тұруын талап етті.
Петропавл қаласының әкімі Марат Тасмағанбетовтың айтуынша, биыл Наурыз мейрамы қарсаңындағы негізгі мерекелік шаралар қаланың басты көшесінде өтеді.
«12 отаудан тұратын этноауыл, қолонершілер көрмесі ұйымдастырылмақ. Мереке қонақтарына палау, бауырсақ, наурыз көже сынды ұлттық тағамдар тегін беріледі. Бағдарламада концерттер, театрландырылған қойылымдар және жаппай домбыра тарту, қара жорға билеу сияқты жоспарлар бар. Қазір мерекеге қызу дайындық жүріп жатыр. Билбордтар мен баннерлер дайындалу үстінде», - деді М.Тасмағанбетов.
Сондай-ақ, оның айутынша, былтырғыдай Петропавлдың барлық ауласында Наурыз мейрамын тойлау бастамасы биыл да жалғасын табады.
«Дайындық жұмыстары жүріп жатыр. Тұрғындар аулаларды абаттандыру жұмыстарына қатысуы керек. Әкімдік тарапынан қар мен қоқысты шығаруға, ағаштарды кесу және сирету жұмыстарына көмек көрсетілетін болады», - деді әкім.
