2018 жылы Қазақстанның оңтүстік аумағынан солтүстігіне 9 мың қазақстандық қоныс аударады, деп хабарлады ҚР еңбек және халықты әлеуметтік қорғау вице-министрі Нұржан Әлтаев.
«2017жылы еліміздің оңтүстігінен солтүстігіне 3350 адам қоныс аударды, алайда 2018 жылы олардың саны шамамен үш есе көп болуы керек. Өкінішке орай, солтүстіктің жастары көбіне үлкен қалаларға, елордаға немесе шетел асып кетіп қалады. Ал, солтүстіктегі демографияның ахуалы нашар болғандықтан жұмыс күшіне тапшылық орын алуда. Оңтүстік аймақтарда жағдай керісінше. Сондықтанда жастардың солтүстік аймаққа барып және онда жұмысқа орналасуы үшін жағдай жасауға қаржы қарастырылған бағдарлама бар», - деді Әлтаев сәрсенбідегі әлеуметтік-еңбек саласындағы мәселелер бойынша халықты ақпараттандыру үшін жасақталған «Әлеумет» бағдарламасының таныстырылымында.
Еңбек вице-министрі түсіндіріп кеткендей, мемлекет 35 АЕК ретінде материалдық көмек көрсетеді және отбасының әрбір мүшесіне 84 175 теңге төлеуде. Жыл бойы тұрғын үйді жалға алу үшін отбасы мүшелерінің санына және қоныс аударған жеріне қарай 16-дан 30-ға дейін АЕК көлемінде қаржы төленуде.
«Сонымен қатар, қоныс аударғандарды жұмысқа алғандар үшін де субсидия қарастырылған. Кәсіпорын әр адам үшін 1 млн теңгеден астам қаржы алады», - деді Н.Әлтаев.
Оның мәліметі бойынша, қоныс аудару Оңтүстік Қазақстан, Жамбыл, Алматы, Қызылорда облыстарынан Маңғыстау, Шығыс Қазақстан, Солтүстік Қазақстан, Павлодар және Қостанай облыстарына жүргізілуде.
Естеріңізге сала кетейік, 2018 жылы оңтүстіктен солтүстікке халықты көшіруге аймақтық квоталардың санын 5 есе - 1700 отбасыға дейін арттыру жоспарланған, бұл дегеніңіз шамамен 7 мың адам.
