Журналист Жұлдыз Тулеуова 6 жыл бұрын Жаңаөзен оқиғасынан кейінгі күндерін еске алады
2011 жыл, 16-желтоқсаннан кейінгі Жаңаөзен... Қалада коменданттық сағат орнаған. Журналистің полиция көзіне көрінуіне болмайды, рұқсат қағазы болмаса. Бірақ соған қарамастан, журналистік міндетімді орындап, Жаңаөзенде жүрмін. Қаза тапқандардың отбасын іздеп тауып, ауруханаға - жараланғандарға барып, одан қалса мәйітханаға барып, күні-түні ұйқысыз ақпарат жинаумен жүрдім.
Алған материалдарды көлік ішінде текстін жазып, монтаждап, ізін суытпай, эфирге жіберіп жатырмын. Бір-екі күн өткеннен кейін Ақтау прокуратурасынан қоңырау соқты. «Прокуратураға келіңіз, Жаңаөзенде арнайы прокурор Серік Қараманов мырза күтіп отыр», -деді. Жанымда Виктор Гудзь деген оператор бар. Сосын сасқанымнан Азаттықтан осында, үлкен жасына қарамай, репортаж жасап жүрген Kazis Toguzbayev ағаға звондап, «Аға, менімен бірге барасыз ба, егер бірнәрсе болып жатса, жағдайымды жеткізерсіз», - дедім. Қазиз аға алып-ұшып, жетіп келді. Содан бір топ жасақ, бізді Астанадан келген бас прокуратураның арнайы прокуроры Серік Қарамановқа алып барды. Оператор Виктор Гудзь бен Қазиз аға кіреберісте қалды.
Көзіне көзілдірік киген Серік мырза кабинетінде К плюсті қарап отыр екен. Эфирде арнайы шығарылым. Жаңаөзенге қатысты оқиғалар беріліп жатыр. «Мына ақпараттың бәрін сен беріп жатырсың ба?», - деді. Мен үндемедім. Сосын эфирден көрсетілген барлық видеоларды сұрады. Тұрғындардың телефондарына түсірген видеоларды кім ютубқа салып жатыр деді. Қысқасы, мына жерден аман-есен шыққың келсе, видеоларды бер деді.
«Мен ешқандай таспа, флешка ұстамаймын, мен тек жазамын»,-деймін. Бірақ шын мәнінде прокурор мырза сұраған видеолардың бәрі менің рюгзагымда жатқан еді. Оның үстіне тұрғындар телефон арқылы оқиғаны түсірген видеоның бәрін bluetooth арқылы көшіріп берген. Ойымның бәрі рюгзактағы дискілер. Әрі қарай Серік мырзаның не сұрап жатқанында шаруам болмады. Бар ойым, дискіні сақтап қалу. Ақыры ашуға мінген прокурор мырза алдыма коменданттық сағатқа байланысты президент жарлығын қойып, «заңды бұзып отырғаныңды білесің бе?»,- деп, кемі 15 тәулікке қамалатынымды айтты. Мен одан да қорқып тұрғам жоқ. Тек, дискіні операторға қалай берем деп ойлап отырмын.
Серік мырза менен түк шығара алмайтынын білді ғой деймін, қасында тұрған жігіттерге «алып кетіңдер» деп дауыс шығарды. Есік алдында бір жас жігіт тұрған.
«Қыз бала ғой, біржола кешірейік»,- деп күмілжіп сөйледі. Оны арнайы прокурор мырзаның жанында тұрған жігіттер де қоштай жөнелді. Серік Қараманов мырза олардан аса алмады. Мені босатты. Мен рюгзагымды құшақтап шықтым.
P.S. Жыл сайын 16 желтоқсанда арнайы прокурордың алдынан аман-есен шыққан видеоларды әлеуметтік желілерден көремін. Әрбірі эфирдің логотипін өшіріп, өз аттарынан беріп жатады. Мейлі бере берсін. Ең бастысы мен түсірген оқиғалардың бәрі көременге жетті. Журналисте одан басқа қандай бақыт бар?!
Дереккөз: Жұлдыз Тулеуованың Facebook парақшасынан алынды. Автордың рұқсатымен жарияланды.
